Búgingi kúnge deıin barlyq shaqyrylǵan taraptar ózderiniń qatysatyndyǵyn rastady. Atap aıtqanda, Reseı delegasııasyn RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegasııasyn TR syrtqy saıası vedomstvo basshysynyń orynbasary Sedat Onal basqarady. Iran delegasııasyna Syrtqy ister mınıstriniń saıası ister jónindegi joǵary kómekshisi Alı Asgar Hadjı basshylyq etedi.
Sonymen birge, atalǵan kezdesýge Sırııadaǵy eki qaqtyǵysýshy tarap – Sırııanyń BUU-daǵy Turaqty ókili Bashar ál-Djaafarı bastaǵan SAR úkimettik delegasııasy jáne Ahmad al-Toýma bastaǵan qarýly oppozısııa qatysady.
Kezdesýdiń jańalyǵy - Astana formatyndaǵy buǵan deıingi kelissózder negizinde qabyldanǵan sheshimge sáıkes, Irak pen Lıvan delegasııalarynyń atalǵan proseske baıqaýshylar retinde qatysýy.
О́kinishke oraı, BUU Bas hatshysynyń Sırııa jónindegi arnaıy ókili Geır Pedersen densaýlyǵyna baılanysty aldaǵy kelissózderge qatysa almaıtyn bolady. BUU delegasııasyn onyń orynbasary basqarady.
Buǵan qosa, osy kúnderi sırııaaralyq kelissózder sheńberinde ótetin Tutqyndardy bosatý, qaza tapqandardyń denelerin tabystaý jáne iz-túzsiz joǵalǵandardy izdestirý boıynsha jumys tobynyń kezekti kezdesýine qatysý úshin BUU Bosqyndar isteri jónindegi joǵarǵy komıssary basqarmasy jáne Halyqaralyq Qyzyl Krest Komıtetiniń ókilderi Nur-Sultanǵa keledi.
Buryn ótken sırııaaralyq kelissózderge uqsas, birinshi kúni «jabyq esik» jaǵdaıynda ekijaqty jáne kópjaqty tehnıkalyq konsýltasııalar, al kelesi kúni jalpy otyrys ótedi. Eki kúndik kelissózderdiń negizgi nátıjeleri Astana prosesiniń kepilger memleketterimen qabyldanatyn Birlesken málimdemesinde baıandalady.
