Ádemi qanattaryn tynymsyz qaǵyp, gúlden gúlge qonyp, shartarapty sharlap ushyp júrgen kóbelek ataýlyny jınaǵan atbasarlyq azamat – tanymal horeograf Ortvın Shlosser. Sońǵy úsh jyl mýzeıge Zerendidegi jekemenshik shańǵy sport bazasynyń dırektory Valerıı Sharov ıe bolyp otyr. Kóbelek kórgisi kelip mýzeı tabaldyryǵynan attaǵan adamdarǵa bar jaıdy ózi-aq maıyn tamyzyp aıtyp beredi. О́tken aıda Amerıka, Germanııa, Belgııa, Úndistan, Aýstralııadan kelgen týrıster Qazaqstandaǵy jalǵyz etnomologııalyq mýzeıge kelip, adam aıtqysyz qyzyqqa kenelip, tańdaılaryn qaǵyp ketipti.
Bul jerde jalǵyz Kóksheniń kóbelekteri ǵana emes, álemniń ár jerindegi asa sırek kezdesetin kóbelekter toptastyrylǵan. Uzyn-yrǵasy 2 myń túrge jýyq. Qumarlyq degendi qoısańshy, áýel basta Ortvın Shlosser ánsheıin qyzyq úshin jınaǵan. Keıin osy taqyrypqa birjola mamandanǵan. Eń sırek kezdesetin ári erekshe túrin ǵana jınaýǵa tyrysqan. Tipti, kóbelektiń ózińde joq túri shetelde kezdesedi dese, bar sharýasyn jınap qoıyp, sol jaqqa tartyp otyrady eken. San sapardyń barysynda álemdegi kóptegen kóbelek jınaýshymen tanysyp, pikir almasqan, tájirıbe jınaqtaǵan. Olardyń arasynda Ortalyq Azııa, Eýropa kolleksıonerleri bar.
Entomologtardyń paıymdaýynsha, eń ádemi kóbelekter tropıkalyq jándikter eken. Olardyń tıtimdeı qanattarynda kempirqosaqtyń barlyq boıaýy bar.
– Kolleksıoner kóbelekti zertteýge 45 jyl ómirin arnaǵan. Bul kez kelgen adamnyń qolynan keletin is emes, – deıdi Valerıı Sharov. Máselen, bir jándiktiń ózin kolleksııalaý úshin 2 saǵattan astam ýaqyt ketedi. Al 2 myńnan astam kóbelekti suryptap daıyndaýǵa she?!
Bylaı qaraǵanda beıkúná jándik bolyp esepteletin kóbelekterdiń zııandysy da bar eken. Máselen, myna biri kádimgi qyryqqabattyń jaýy – aq qanatty kóbelek. 2 myńnan astam jumyrtqa salatyn tıtimdeı ǵana aq qanatty kóbelekpen ýaqytynda kúrespese, alqabyńyzdyń astan-kesteńin shyǵarmaq. Jergilikti jerdiń kóbelegi tańsyq emes. Bala kezimizde talaıyn qýǵanbyz. Al Aýstralııa, Fransııa, Fılıppın, Malaızııadan ákelingen kóbelekterdiń túri men turqy bizdegiden bólekteý. Qaı tusqa qarasań da san túrli boıaýly, pishini árqıly alýan túrli kóbelek. Ishinde júrgende kóńildi de kóbelek sezim bıleıdi eken.
Adam kóńilin baýraıtyn áýesqoılyqta shek joq-aý, sirá.
