– Baqyt Beshimbekuly, dál mynadaı rekordtyq kórsetkish bizdiń elde buryn-sońdy bolmaǵan edi. Dál osyndaı nátıjeniń qupııasy nede?
– Biz byltyrǵy Býenos-Aıreste jasóspirimder arasynda ótken Olımpııa oıyndaryna tyńǵylyqty daıyndaldyq. Ol kezde komandada segiz adam bolǵan. Ulttyq qurama tap bolǵan keleńsiz jaǵdaıǵa baılanysty Halyqaralyq aýyr atletıka federasııasy bizge de Olımpıadaǵa qatysýǵa múmkindik bermeı qoıdy. Sondyqtan basty nazar Las-Vegasqa aýysty. Jyldyń basynan bastap Túrkııada eki oqý-jattyǵý jıynyn ótkizdik.
Sońǵy daıyndyqty Talǵarda AIVA-nyń bazasynda pysyqtadyq. Taýly jerdi tańdaýymyz beker emes. Iаǵnı, bıiktik adamdy tózimdilikke úıretedi, Las-Vegas tegis jerde ornalasqan. Taýdan túsken soń on kúndeı ziltemirdi kóterý ońaıǵa soǵady. Onyń ústine bizdiń sportshylar eki jyl boıy halyqaralyq jarystarda óner kórsetken joq, jaýapkershilik júginiń aýyr ekenin túsindi. Tym quryǵanda qola medal enshileýimiz kerek degen maqsatpen attandyq.
– О́zińiz de bir suhbatyńyzda úzdik úshtikke iligý týraly oıyńyzben bólisip edińiz. Al nátıjesinde beseýdiń beseýi de altyn aldy. Negizi maqsat qandaı bolyp edi?
– Bastapqyda bir nemese eki altyn alsaq degen josparymyz bolǵan. Álemdik rekord ornatqan Saıhan Taısýev pen Sápı Esengeldıev basty úmitkerlerimiz edi. Sebebi bul ekeýiniń jattyǵý kezinde baǵyndyrǵan salmaqtary álem chempıonatynda kórsetken nátıjeden 10 kelige artyq boldy. Saıramkez Aqmoldany úshtikke iligedi dep oılasaq, Bekbolat Rahatty tájirıbe jınasyn dep aparǵanbyz. Bekbolattyń jasy nebári 15-te, tym jas. Sóıte tura barlyǵy minez tanytyp, jeńiske jetti.
– Sonda olar jattyǵýdaǵy kórsetkishterinen asyp tústi me?
– Dál solaı. Alty múmkindiktiń altaýyn da tıimdi paıdalandy. Bul – jas sportshy úshin óte joǵary kórsetkish. О́z-ózine degen senim arta túsedi. Sondyqtan shákirtterime «jaraısyńdar» deımin.
– Dopıng daýy halyqaralyq uıymdardyń bizge degen senimine selkeý túsirgeni anyq. Onyń sońy medaldardy tartyp alý, jarystardan shettetýge deıin apardy. Osydan keıin álem chempıonatynda bizdiń órenderge bes birdeı altyndy qalaı berdi eken degen suraq týyndaıdy...
– Olar bere salǵan joq, biz tartyp aldyq.
– Qandaı da bir qysym baıqaldy ma?
– Ondaı eshteńe bolǵan joq. Qaıta amerıkalyqtar bizdiń balalardyń ónerine tamsanyp, qaıta-qaıta kelip quttyqtap, maqtaý sózderin aıtyp jatty. AQSh quramasynyń bas bapkeri men federasııa prezıdenti de arnaıy kelip quttyqtady. Bas bapkeri kezinde Olımpııa oıyndarynda úsh ret top jarǵan sportshy. Onyń ózi bizdiń 100 paıyzdyq kórsetkishimizdi erekshe atap ótti.
– Al balalardy jigerlendirý úshin ne aıttyńyz?
– Jarysqa deıin «jattyǵý kerek» degendi qaıtalaı berdim. Sebebi árbir jetistiktiń artynda tynymsyz eńbek turady. Qazir neǵurlym kóp jumys istep, aýyr salmaqty baǵyndyrsańdar, chempıonat kezinde ózderińe ońaı bolady deıtinmin. Al týrnır kezinde jalyndy sózder aıtýdyń qajeti de bolǵan joq. Balalardyń boıynda sabyrlylyq pen senimdilik sezildi. Eshkim ýaıymdap, qobaljyǵan joq. Qaıta qasyma kelip jospardaǵydan da aýyr salmaqty kóteremiz dep qoımaı qoıdy. «Aldymen altyn alaıyq, sosyn áleýetterińdi tolyqtaı tekseremiz» dedim. Iаǵnı, kózdegen meje oryndalǵan soń ǵana álemdik rekordtarǵa kóz tiktik.
– Dopıng daýlarynan soń bizdiń elde aýyr atletıkaǵa degen kózqaras ózgerdi me?
– Munyń bári elimizdiń aýyr atletıka tarıhynda jaǵymsyz jaıt retinde saqtalary anyq. Degenmen qyzyǵýshylyq tómendegen joq. Ziltemirdi basynan asyrǵysy keletinder kóp. Tıisinshe óńirlerde báseke joǵary deńgeıde. Aýyl-aımaqty aralap júrip, daryndy balalardyń kóptigine kóz jetkizip kelemin.
Áńgimelesken
Álı BITО́RE,
«Egemen Qazaqstan»
