Kishi júzdiń uly hany, HVIII ǵasyrda jońǵarǵa qarsy qazaq qolynyń bas qolbasshysy Ábilqaıyr han men onyń jubaıy, qoǵamdyq-saıası oqıǵalarǵa da qatysqan qaıratker Bopaı (Bátıma) hanym Súıindikqyzynyń dúnıege kelgenine 325 jyl tolýyna arnap shyǵarylǵan kitapta han men onyń urpaqtary týraly maqalalar hronologııalyq retpen ornalastyrylǵan. Jınaqqa alǵysóz jazǵan tarıh ǵylymdarynyń doktory, professor Ábilseıit Muqtar: «Bul jınaq Bopaı anany ulyqtaǵan alǵashqy eńbek. Bopaı hanym HVIII ǵasyrdan keıingi barsha qazaq analaryna úlgi bolǵan tulǵa. О́ıtkeni Bopaı ana ótken tarıhymyzdaǵy óz eline basa-kóktep kirgen parsy bıleýshisi Kırdi oısyrata jeńgen Uly Saq hanshaıymy Tumardyń, memleket múddesin, halqynyń bolashaǵyn jeke basynan joǵary qoıǵan saq qyzy Zarınanyń, saıyn dala shejiresinde iz qaldyrǵan Domalaq ana, Baıan sulý, Qurtqa, Aqjúnis, Qyz Jibekterdiń jalǵasy edi» deıdi.
Oralda ótken tusaýkeserde tarıh ǵylymdarynyń kandıdaty Jańabek Jaqsyǵalıev Ábilqaıyr han tulǵasy jóninde qalyptasqan keıbir pikirlerdiń jańsaqtyǵyna toqtalyp, atalǵan eńbektiń otandyq tarıh ǵylymyndaǵy aqtańdaqtardyń ornyn toltyratynyn aıtty. Qadyr Myrza Álı atyndaǵy mádenıet jáne óner ortalyǵynyń dırektory Baýyrjan Halıolla jınaqty qurastyrýshy Islam qajy Myrzabekulynyń buǵan deıin 17 kitap qurastyryp, ólketaný ǵylymyna zor úles qosqan avtordyń eńbegin jınalǵan qaýymǵa tanystyryp ótti. Batys Qazaqstan oblystyq tarıh jáne arheologııa ortalyǵynyń dırektory Jantas Safýllın, alashtanýshy, tarıh ǵylymdarynyń kandıdaty Dámetken Súleımenova jáne basqalary jańa kitaptyń qundylyǵyn biraýyzdan maquldady.
Kezdesý sońynda jınaq avtory kitaptyń birneshe danasyn Oral qalasyndaǵy kitaphana bólimshelerine tartý etti.
Batys Qazaqstan
