Mýzeı meńgerýshisi Áıgerim Seriktiń aıtýynsha, kórme ekspozısııasynan Abaı Qunanbaıulynyń, Jambyl Jabaevtyń kishi kólemdi qazaq tilindegi, shyǵys ǵulamalarynyń, sondaı-aq qasıetti Quran kitaptaryn, álemdik ádebıettiń kórnekti ókilderi A.S.Pýshkın, M.Gorkıı, L.Tolstoıdyń, Dante Alıgerı, Ýılıam Shekspır, Dennı Dıdro kitaptaryn kezdestirge bolady.
«Ǵylym ordasy» Sırek kitaptar mýzeıiniń kishi ǵylymı qyzmetkeri A.Jumabekovtyń yqsham kitaptardyń tarıhyna qatysty zertteýlerine súıenetin bolsaq, dúnıe júzinde mıkroskoptyń kómegimen ǵana oqıtyndary da kezdesedi. Ondaı nano-kitaptar sanatyna 70 mkm/100 mkm kólemindegi monokrıstaldy kremnıı chıpine basylǵan «Ternıp qalasynan kelgen kishkentaı Ted» kitaby jatady. Eýropa elderi, sondaı-aq Amerıkada yqsham kitaptardyń kólemi 3 dıýım nemese 76 mm bolsa, postkeńestik elderde 100 mm quraıdy. Tipten, kólemi 10h10 mm aspaıtyn kitaptar da kezdesedi. Búginde Gınnestiń rekordtar kitabyna nano-kitaptarǵa jatpaıtyn shaǵyn chıpke syıyp ketetin basylymdar da kiredi.
Shaǵyn kólemdi kitaptar tarıhyn zertteıtin tarıhshylar bul kitaptardyń alǵashqy nusqalaryn 4000 jyl buryn Vavılonda tabylǵandyǵymen baılanystyrady. Antıkalyq dáýir derekterinde, atap aıtar bolsaq, 37 kitaptan turatyn Planııdiń «Tarıh» shyǵarmasynda 15 686 shýmaqtan turatyn Gomerdiń «Ilıadasynyń» jańǵaq qabyǵyna sııarlyq pergamentterindegi nusqasy atalady. Baspa mashınalary paıda bolǵanǵa deıin kóp taralymmen basylmastan buryn mundaı kitaptar joǵary sanatty óner týyndysy sanalǵan. Iаǵnı, jasalý tehnıkasynyń kúrdeliligi, estetıkalyq beınesi, qolaılylyǵy, bezendirilýi joǵary baǵalanyp, kolleksıonerlerdiń paıdasyna asqan. Bastapqyda kishi kólemdegi duǵa kitaptary basylǵan.
Shaǵyn kitaptar kórmesimen qyrkúıek aıynyń sońyna deıin tanysýǵa bolady.
