Jambylda utymdy ekspedısııa uıymdastyrdy

Maqalada halyq sanasyna jalpy­ult­tyq qasıetti oryndar uǵymyn sińi­rý maqsatynda «Qazaqstannyń kıeli jer­leriniń geografııasy» jobasy qol­ǵa aly­natyny jáne onyń aýqym­dy baǵdarlama bolatyny aıtyldy. Osy rette týǵan jerimizdi, tarıhymyzdy, rýhanı-mádenı muramyzdy boıymyzǵa sińirý, jańa deńgeıde tanyp-bilý, ony jastarǵa uǵyndyrý maqsatynda Baızaq aýdandyq tarıhı-ólketaný mýzeıi «Uly dala – urpaqqa amanat» atty ekspedısııa uıymdastyrdy.

Oǵan mýzeı qyzmet­ker­le­rimen qatar, oblys jastary arasyndaǵy «Áýlıeata jaýharlary» atty tarıhı-tanymdyq ekspedısııasy negizinde aýdanymyzǵa atbasyn tiregen Moıynqum komandasy da qatysty.

Jas tolqyn aldymen ortalyqtaǵy murajaıǵa taban tirep, eki myńnan asa jádigeri bar mekemeniń arheologııa, tarıh, dańq, mádenıet, óner jáne sport, etnografııa zalda­ryn aralap kórdi. Munan keıin erte temir-qola dáýir­le­rinen bel­gili Qarasaı shat­qa­lyndaǵy petroglıf­terdi óz kózderimen kórip, Baızaq batyr Mámbetulynyń kesenesine minájat etti.

Ekskýrsııa 2007 jyly IýNESKO-nyń Búkil­álem­dik mura komıtetine engi­zil­gen Qostóbe jáne Túımekent aýylynyń oń­tús­­tik shyǵys shetinde orna­lasqan Túımekent qala­shyq­ta­ryn­da jalǵasty. Osynaý mádenı oryndardyń tarıhyn aýdandyq tarıhı-ólketaný mýzeıiniń ǵylymı qyzmetkeri Aınagúl Ma­mytbekova keńinen túsin­dir­di.

Jastar barǵan kelesi nysan – ortalyq saıa­baq­taǵy A.Sýhanbaev, Sarykemer aýylyna kire­beristegi Baızaq batyr Mámbetulynyń eskert­kish­teri boldy. Moıynqum jas­tary munymen qatar, «Ádemi» ulttyq kıim­der sheberhanasyna da keldi. Kórse kóz toımaıtyn er, áıel, jas balalar men qyzdarǵa ulttyq naqyshtaǵy shapan, kóki­rek­she, kóılek tigetin sheberhana jumysy olardy qyzyqtyrmaı qoımady. Jastardyń ál-Farabı atyndaǵy aýdandyq má­de­nıet úıiniń dırektory Amangeldi Tilepovpen bol­ǵan suhbaty da barynsha mándi ótti.

Gúlaıym BAIMURATOVA,

Baızaq aýdandyq tarıhı-ólketaný mýzeıiniń qyzmetkeri

Jambyl oblysy