Eńbegine laıyq talaı qurmetke ıe boldy. Omyraýy tolǵan orden, medal. Syrdarııa aýdanynyń qurmetti azamaty.
Bıyl toqsanǵa shyqqan aqsaqal áli qýatty, boıy tip-tik. Kıimdi mezgiline qaraı kıedi, ústine shań jýytpaıdy. Shalbar-kóılek, galstýgin juqa dákeni ylǵaldap, ózi ótekteıdi.
Biz barǵanda ardager aǵa keń zaldyń tórinde jazý stolyndaǵy oryndyqta otyr eken. Alańdaı berdi:
– Poshta nege keshigip jatyr? Tańerteńgi onnan qaldyrmaı gazetterimdi ákeletin edi. Poshtadaǵy qyzdarǵa telefon soǵaıynshy dep ornynan qozǵaldy.
– Qyzdarym-aý, gazet keshigip jatyr ǵoı.
– Hamıt aǵa, álgi hat tasýshy qyzdar sizdiń úıge attanyp ketti. Qazir baryp qalar.
– Á, jaraıdy. Syrtqa shyǵaıynshy, dep Hamekeń darbaza syrtyna shyqty. Áýdem jerden hat tasýshy qyzdar kórindi. Sálden soń bir býma gazetti ardager qushaǵyna qysty. Júzi jadyrap qoıa berdi. Dereý bólmesine kirdi. Aldymen óziniń súıikti baýyr basqan «Egemen Qazaqstannyń» ár betine zer sala kóz júgirtti. Telefonǵa qol kóterip, tus-tustaǵy syılas azamattarǵa qońyraý shaldy.
– Búgingi «Egemendi» aldyńdar ma? Myrzataıdyń Rollan jaıynda jazǵanyn oqydyńdar ma? Álgi Baımurat batyr jaıynda jazylǵan dúnıe jaqsy eken. Syr súleıi Turmaǵambet Iztileýovtiń jańa qoljazbasy tabylypty, oqyńdar.
Ardager osylaısha kún saıyn syılas azamattardy mazalaıdy. Jıyn-jınalystarda «Egemendegi» ana dúnıe, myna dúnıeni oqydyńdar ma dep qamshylaıdy, basylymdardaǵy ótkir sózderdi qoıyn dápterine jazyp, ony da tilge tıek etýden jalyqpaıdy.
Bir kezdegi osy «Egemende» eńbek etken Ázilhan Nurshaıyqov, Jeken Jumahanov, Muqan Imanjanov, Nurı Muftaqtardan sóz qozǵaıdy. Baspasóz darabozdary Sherhan, Sapar, odan soń Uzaq Baǵaev jaıynda, Uzaqtyń jazýshy Zeınolla Shúkirov jaıynda jazǵan «Qurysh qazaq» atty ocherkin maıyn tamyza aıtqanda sýsynyń qanady. Sherhan, Kamaldardyń jazysqan hattaryn, Sheraǵanyń «Bir kem dúnıesin» jalǵastyrǵanda, tańyrqaısyń.
Syrdyń syrbaz aqsaqaly Hamıt Embergenov qazir 33 nemere, 70 shóbere, 2 shópshektiń qushaǵynda. О́sirgen on ul-qyzynyń bári de joǵary bilimdi. Solardyń ystyq qushaǵyna bólenip otyrǵanyn jyr etip aıtýdan jalyqpaıdy.
– «Egemenniń» 100 jyldyǵy – úlken qýanysh. Bul meniń elý jyl boıy úzbeı jazylǵan, ár sany esime umytylmas áser qaldyrǵan gazetim. Basylymdaǵy qalamy ushqyr jýrnalısterdiń qalam silter qadamyna qýanamyn. Ardagerler qaýymyn aldaǵy jylǵa jazylýǵa belsendilik tanytýǵa shaqyramyn. Ár shańyraqta basylymdy súısine, asyǵa oqıtyndar kóbeıse, – deıdi ardager Hamıt Embergenov.
Qaıyrbek MYRZAHMETULY
