Al 4-ýinde lıft múldem istemeıdi. Hımenko kóshesi 9-shy úıde turatyn qart adamdar shırek ǵasyrǵa jýyq toǵyzynshy qabatqa jaıaý kóterilip, túsýge májbúr. Olardyń jaǵdaıynan qalalyq ákimdik habardar bolǵanymen, sharasyz.
«20 jyldan astam ýaqyt boıy kórip kele jatqan teperishimiz osy. Bul úıde 200-den astam páter bar.Osynda kóship kelgennen beri jaıaý kóterilip júrmin. Jasym kelgendikten, dúkenge ǵana baramyn. Áıtpese, jipsiz baılanyp otyrǵanyń. Aýlaǵa shyǵyp, qydyrýdyń ózi-bir muń», deıdi Tatıana Berezına ábden nalyǵan únmen. Erli-zaıypty Sársekeevterge de jetinshi qabatqa jetý – úlken mashaqat.
Kezinde qoldanysqa berilgen lıft nebári 8 jyl qyzmet etken.Qazir qural-jabdyqtary urlanyp, qoldy bolyp ketken. Orny úńireıip turǵan shahta tas bekitilip tastalǵan. Úıge qashan jedelsaty ornatylady?degen saýalǵa ákimdiktegiler ony jańalaýǵa mindetti emespiz dep jaýap qaıtarǵan. Turǵyn úı qatynastary bólimi basshysynyń mindetin atqarýshy Madııar Jangýdınniń aıtýynsha, lıft ortaq menshik sanalǵandyqtan, bul máseleni turǵyndar ózderi birlesip sheshýi tıis. 2000 jyldary jergilikti bıýdjet qarajaty esebinen jóndeýge usynys jasalǵanymen, ortaq sheshimge kele almaǵandyqtan bastama aıaqsyz qalǵan.
«Ol kezde qondyrǵynyń kabınasy men motory saý bolatyn.Endi jańasyn ornatý úshin kemi 9 mıllıon teńge qajet. Turǵyn úılerdi jańǵyrtý baǵdarlamasyna enip otyrmyz. Jobalyq-smetalyq qujat ázirleýge úshin ár páterden 3 myń teńge jınaldy. Biraq 2014 jyly jasalǵan smetalyq qujat jaramsyz dep tanylyp, qoldaǵy qarajat jetkiliksiz bolyp otyr. Qujatty rásimdeýge qarjy tappasaq, jańa lıftige qaıdan tabamyz?» deıdi «Hımenko 9» PIK-niń tóraıymy Olga Kazanseva sharasyzdyqtan alaqan jaıyp.
Lıftilerdi jańǵyrtý boıynsha jańa zań jobasy ázirlenip, Májilis tarapynan maquldanypty. Senat qoldaý kórsetse, ákimdikter erikti túrde jedelsatylardy ornatýǵa nemese jóndeýge bıýdjetten qarajat bóle alatyn bolady. Al turǵyndar jumsalǵan aqshany 7-10 jyldyń ishinde qaıtarýlary tıis.
«Aıta-aıta «Altaıdy», Jamal apa qartaıdy» demekshi, ázirge jedelsaty jyryna núkte qoıýǵa erte.
Soltústik Qazaqstan oblysy
