Baıqaý vokal nomınasııasy boıynsha ótkizildi. Qatysýshylar dýet, trıo, kvartet retinde jáne estradalyq, akademııalyq jáne halyqtyq janr týyndylaryn usyndy. Konkýrstyq baǵdarlamalardyń taqyryptyq baǵyty patrıottyq sıpatqa, qazaqstandyq jáne sheteldik kompozıtorlardyń ánderiniń oryndalýyna, Qazaqstan halyqtarynyń jalpyulttyq kelisiminiń basymdyqtaryna sáıkes kelýi tıis.
Festıvalge oblysqa qarasty aýdandyq polısııa bólimderi men qalalyq Polısııa basqarmalarynan bas-aıaǵy 18 úmitker qatysty. Olardyń ónerin Qostanaı oblysy PD bastyǵynyń orynbasary, polısııa polkovnıgi Ardaq Yntyqbaev bastaǵan qazylar alqasy baǵalady. Baıqaý aldynda Ardaq Qabykenuly qatysýshylarǵa sáttilik tiledi.
- Bul is-shara Elbasynyń «Bolashaqqa baǵdar: rýhanı jańǵyrý» jáne Jastar jyly aıasynda uıymdastyrylyp otyr. QR Ishki ister mınıstrligi úshin QR Tuńǵysh Prezıdenti - Ult Kóshbasshysy Nursultan Ábishuly Nazarbaev belgilegen basym mindetterdiń arasynda qoǵamda polısııanyń bedelin arttyrýǵa baǵyttalǵan uıymdastyrý-tájirıbelik sharalar keshenin júzege asyrý, jeke qurammen ıdeologııalyq jáne tárbıe jumystaryn júrgizý basty nazarǵa alynǵan. Qatysýshylarǵa Qostanaı oblysy PD bastyǵy, polısııa general-maıory Bekket Imanuly Aımaǵambetovtiń atynan shyǵarmashylyq shabyt pen sáttilik tileımin! - dedi polısııa polkovnıgi A.Yntyqbaev.
Jınalǵan jurtshylyq tártip saqshylarynyń oryndaý sheberligine tánti boldy. Kópshiliktiń mundaı sheberlikti kútpegeni anyq, kúmis kómeı polıseıler birinen biri asyra shyrqap jatty. Degenmen, baıqaý erejesine sáıkes qazylar úzdigin tańdady.
Qazylar sheshimi boıynsha oblystyq «Ár júrekte – týǵan jer» atty patrıottyq ánder art-festıvalinde úshinshi oryndy Fedorov aýdany polısııa bóliminiń ýchaskelik polısııa ınspektory Raýan Qalıev ıelendi. Ekinshi oryn Memlekettik kúzet qyzmeti basqarmasynyń dýeti men Qostanaı qalalyq Polısııa basqarmasy tergeý bóliminiń aǵa tergeýshisi, polısııa kapıtany Gúlmıra Esenǵalıevaǵa buıyrdy. Birinshi oryndy Qamysty aýdandyq polısııa bóliminiń jol-patrýldik polısııa tobynyń qyzmetkeri, polısııa serjanty Erlik Suraǵanov jeńip aldy.
Al baıqaýdyń bas júldesin Qostanaı aýdany polısııa bóliminiń ıývenaldy polısııa tobynyń kámeletke tolmaǵandar isteri jónindegi ýchaskelik polısııa ınspektory, polısııa aǵa leıtenanty Amanat Kákimjanov jeńip aldy. Endi ol bul baıqaýdyń Petropavl qalasynda ótetin respýblıkalyq kezeńinde qostanaılyq polıseılerdiń namysyn qorǵaıtyn bolady.
