Korporatıvtik ýnıversıtet uǵymy eńbek naryǵynda 1950 jyldary qoldanysqa endi. 1914 jyldan beri qyzmetkerlerin oqytýdyń tıimdi ádisterin izdep kelgen General Electric kompanııasy 1956 jyly júıelengen oqý ornyn ashady. Odan keıin 1961 jyly áıgili McDonald's korporasııasy restoran menedjmentin oqytatyn Hamburger University-diń jumysyn bastaıdy. Búginde 80 000 túlegimen maqtanatyn oqý ordasy áli de korporatıvti ýnıversıtetter kóshin bastap tur. AQSh-ta bastalǵan fenomen kóp uzamaı álemniń basqa da memleketterinde jalǵasyn tapty. 1988 jyly AQSh-ta korporatıvti ýnıversıtetter sany 400 bolsa, búginde 4000-ǵa jetipti.
Korporatıvti ýnıversıtetterdiń mindetteri ár alýan. Degenmen negizgi maqsaty – qyzmetkerler men basqarý júıesin úzdiksiz damytyp otyrý. Álemdik korporasııalardan úlgi alǵan kompanııalar elimizde de bar. Búginde qurylys salasyndaǵy úzdik kompanııalardyń biri sanalatyn BI Group pen «Samuryq-Qazyna» ulttyq ál-aýqat qory» AQ ózderine tıesili ýnıversıtetterimen maqtana alady.
Ár ýnıversıtettegi dáristerdiń formattary men oqý merzimi ártúrli. Biraq tek óz qyzmetkerlerimen shektelip qoımaı, maman daıarlaýdyń qalyptasqan úlgisin basqa da kompanııalarmen bólisýge ázir. «Samuryq-Qazyna» korporatıvtik ýnıversıteti alǵashynda «QazMunaıGaz» kompanııasynyń bastamasymen kadrlardy damytý ortalyǵy retinde ashyldy. 2009 jyly «Samuryq-Qazyna» kompanııasyna ótip, ýnıversıtet retinde qaıta qurylady. Sodan beri oqý orny 223 semınar ótkizip, 19 903 maman oqytqan. Oǵan qosa qashyqtyqtan oqytý júıesi de qolǵa alynǵan. Vırtýaldy ýnıversıtet baǵdarlamasy boıynsha 78 kýrs usynady.
Kompanııa mamandardy daıarlaý mindetin tolyqtaı ýnıversıtetke júktegen. О́ıtkeni oqý ornynyń kýrstary basshylarǵa arnalǵan baǵdarlamadan bastap, «HR Qyzmet» dep atalatyn kadr mamandary kýrstary, komanda qurýǵa arnalǵan sharalardy da qamtyǵan. Sonymen birge korporatıvti semınarlar ótkizip turady. Jyl saıyn ýnıversıtet túlekteri arasynda konkýrs jarııalanyp, úzdikterin ýnıversıtette tegin oqytyp, kompanııaǵa jumysqa ornalasýǵa múmkindik beredi. Al BI Group kompanııasyna tıesili BI University elimizde ǵana emes, Reseıdiń Irkýtsk qalasynda da maman daıarlaıdy. Oqý orny tórt baǵytta jumys isteıdi. Kásibı baǵyt sala boıynsha mamandardyń bilimin jetildirse, korporatıvti baǵdarlamalar kompanııa etıkasy, bıznes strategııasy sııaqty daǵdylardy úıretedi. Basqarý baǵdarlamalary kóshbasshylardy daıarlap, eńbek naryǵyndaǵy qajetti biliktilikterdi oqytyp, tek kompanııa menedjerlerimen shektelmeı, basqa da uıymdardyń basshylaryna qabiletin arttyrýǵa múmkindik beredi. Sonymen birge tulǵalyq damý baǵdarlamalary adam boıyndaǵy jeke qasıetter, kásibı damýǵa qajetti daǵdylardy oqytyp, stýdentterge baǵyt-baǵdar beretin trenıngterden turady. Ýnıversıtet búginde Nur-Sultan, Almaty jáne Irkýtsk qalalarynda jumys isteıdi. BI University de otandyq JOO stýdentterin iriktep, olarǵa kompanııanyń qalyptasqan erejeleri men mádenıetin úıretip, keleshekte qurylys salasyndaǵy úzdik kompanııaǵa jumysqa ornalasýǵa múmkindik beredi. Oqý orny 2012 jyly ashylǵannan beri 7000-nan astam maman daıarlaǵan. Olardyń 58-i búginde korporatıvti ýnıversıtet trenerleri.
Elimizde korporatıvti bilim berýdi qolǵa alýǵa múmkindigi bar kompanııalar barshylyq. Máselen, «QazMunaıGaz», «Qazaqmys», «Qazaqstan temir joly» nemese jylyna 19,2 mlrd teńge tabys kóretin 2000 jumysshysy bar «Baıan Sulý» kondıterlik kompanııasy óz mamandaryn ózderi daıarlaýǵa múmkindikteri bar. Korporatıvtik ýnıversıtetter, ıaǵnı óz kadrlaryn ózderiniń qalyptastyryp úlgergen erejeleri, júıesine saı oqytý kompanııa shyǵynyn azaıtpaq. О́ıtkeni onsyz da jıi ózgeretin eńbek naryǵynyń suranysyna sáıkes mamandardy qaıta oqytý, biliktiligin arttyrý kompanııanyń ósýiniń alǵysharty. Training Magazine halyqaralyq jýrnaly 2017 jyly shaǵyn kásiporyndar qyzmetkerlerin qaıta oqytý úshin adam basyna 1 886 AQSh dollaryn jumsaǵanyn anyqtaǵan. Oǵan qosa, ár qyzmetkerge qaıta daıarlaý kýrstary úshin ortasha eseppen 33,5 jumys saǵaty qajet eken. Patriot Software kompanııasy jumysshylar jalaqysynyń 21,4 paıyzyn qaıta daıarlaý kýrstaryna jumsaıtynyn aıtady. Elimizdegi statıstıkaǵa kóz júgirtsek, 2017 jyly 89 myń otandyq muǵalimdi qaıta daıarlaýǵa 13,3 mlrd teńge bólingen. Dál sol jyly respýblıka boıynsha muǵalimderdiń jalpy sany 325 myń bolǵanyn eskersek, qalǵan muǵalimderdi jańa baǵdarlamaǵa saı qaıta daıarlaý úshin taǵy da 35 mlrd teńge qajet eken.
Sarapshylar korporatıvtik ýnıversıtetter arqyly kompanııanyń kadrlardy oqytýǵa ketetin shyǵynyn 10 paıyzdan 50 paıyzǵa deıin qysqartýǵa bolatynyn aıtady. Kórshiles Reseıde korporatıvtik ýnıversıtetter sany jyl sanap artyp keledi. «Gazprom», «IýKOS», «Rosınter Restorans», «Ingosstrah», «Evrosıb», «Sberbank» kompanııalarynyń basshylary korporatıvtik ýnıversıtet materıaldyq shyǵyndardyń azaıýymen qatar, mekeme jumysynyń tıimdiliginiń artqanyn aıtady. «Ingosstrah» kompanııasynyń mamandardyń biliktiliktiligin arttyrý ortalyǵynyń basshysy Lıýbov Gvozdılına qyzmetkerlerdi kompanııa ishinde oqytý arqyly bir jylda 76 000 AQSh dollaryn únemdegenin aıtady. Onyń aıtýynsha, 2000 jyly kompanııa qyzmetkerleriniń 76 paıyzy erikti túrde qaıta daıarlaý kýrstaryna jazylýdy bastaǵan.
Joǵarydaǵy statıstıka men álemdik kompanııalardyń mysaldary mamandardy kompanııa ishinde oqytý tek ekonomıkalyq turǵydan bólek, qyzmetkerlerdi yntalandyrý, jańa tehnologııalarǵa qyzyqtyrý, ýaqyt únemdeý jaǵynan da tıimdi ekenin dáleldep otyr. Jańa deńgeıdi baǵyndyrǵan mamannyń jańa laýazymǵa kóterileri sózsiz. Bul qyzmetkerge jiger men senim berip, úzdiksiz damýǵa jeteleıdi. Ekonomıkalyq shyǵyny bylaı qalǵanda, ýnıversıtet túlekteriniń arasynda úzdikterin tańdaýǵa, olardy qalyptasyp úlgergen erejeler men júıede oqytyp, kompanııanyń dástúri men mádenıetin, maqsaty men mindetin eńbek naryǵyna endi qadam basqan jas mamanǵa sińirýge, beıimdeýge múmkindik beredi. Ýnıversıtet túlekteri óz túıgenderin áriptesterine úıretip, mekeme ishinde qyzmetkerlerdiń birin biri qoldaý sııaqty mańyzdy ári jaqsy dástúr qalyptastyrady. Basqasha aıtqanda, korporatıvti ýnıversıtet mekeme shyǵynyn azaıtyp qana qoımaı, jumys tıimdiligin arttyrý, eńbek naryǵyndaǵy suranysqa daıyn bolý, mekeme ishindegi atmosferany jaqsartý, qyzmetkerler arasyndaǵy, jumys berýshi men jumysshy arasyndaǵy baılanysty nyǵaıtýǵa sebep bolatyn orta.
