Densaýlyq aılyǵynyń alǵashqy kúni jyljymaly medısınalyq keshen Túrksib aýdanyna kelip, tórt júzden astam turǵyndy tekserýden ótkizdi. «Nurshashqan» shaǵyn aýdanynyń turǵyndary salalyq mamandardyń qyzmetine júginip, júrek, búırek, býyn, kóz, t.b. aýrýlarǵa tekserilip, dárigerlik keńes aldy. Densaýlyq aılyǵy aıasyndaǵy bul sharaǵa qaladaǵy onkologııa, JQTB, Salamatty ómir saltyn qurý, juqpaly teri aýrýlary ortalyqtary jáne № 20 emhananyń kásibı mamandary jumyldyrylǵan.
Almaty qalasynyń Qoǵamdyq densaýlyq basqarmasynyń basshysy Qanat Tósekbaevtyń aıtýynsha, densaýlyq aılyǵynyń maqsaty – qala ortalyǵynan qashyq turatyn aýdan turǵyndarynyń densaýlyǵyna qoldaý kórsetý men qoljetimdi medısınany qamtamasyz etý. О́ıtkeni qashyqta turatyn qart adamdardyń, balaly analardyń emhanaǵa der kezinde kelip qaralýyna múmkindikteri bola bermeıdi. Sondyqtan qandaı da bir aýrýdyń aldyn alý maqsatynda qalanyń árbir turǵyny dárigerge ýaqytynda qaralýy lázim. Der kezinde anyqtalǵan aýrýdy emdeýdiń jeńil bolatynyn aıtqan qalanyń bas dárigeri qala turǵyndaryn densaýlyǵyna sergek qaraýǵa shaqyrdy.
Almaty qalasynyń Qoǵamdyq densaýlyq basqarmasynyń baspasóz qyzmetiniń málimeti boıynsha, jyljymaly mobıldi keshenderdiń shyǵý kestesimen Almaty qalasy ákimdiginiń resmı saıtynan jáne Instagram, Facebook paraqshalarynan tanysýǵa bolady.
ALMATY
