Týrıstik ekspedısııalyq jasaqtardyń sleti úshinshi ret ótkizilip otyr. Alaıda, bul joly sletke 9 aýdan men qaladan aýdandyq jáne qalalyq kezeńderdiń jeńimpazdary bolyp tabylǵan 210 oqýshy qatysty. Is-sharanyń maqsaty – balalar men jastardy patrıottyq sezimge tárbıeleý, salamatty ómir saltyn nasıhattaý, otrıadtardyń týrıstik qyzmetin kúsheıtý. Oblystyq bilim basqarmasynyń «Daryndylyq pen qosymsha bilim berýdi damytýdyń Shyǵys Qazaqstan ǵylymı-ádistemelik «Daryn» ortalyǵy dırektorynyń orynbasary Elena Shımınanyń aıtýynsha, árbir qatysýshy ekologııalyq-bıologııalyq jáne ǵylymı-tehnıkalyq baǵyttaǵy óz jumystaryn tanystyrýǵa, týrıstik sheberlikti, ekologııalyq mádenıetti damytý, óńirdiń tarıhy men geografııasy, oqýshylardyń týǵan elge degen kózqarasyn qalyptastyrý jaıly oılaryn tolyq jetkize alýy tıis.
Sletke qatysýshylar Batys Altaı memlekettik tabıǵı qoryǵyna joryqqa shyǵyp, «Komandanyń vızıttik kartochkasy» baıqaýynda kúsh synasty. Bul baıqaýda Shemonaıha aýdanynyń «Jastar» komandasy birinshi oryndy ıelendi. Katonqaraǵaı aýdanynan kelgen «Araıly Shyǵys» jáne Glýbokoe aýdanynan kelgen «Murager» komandalary ekinshi orynǵa, al Borodýlıha, Altaı jáne Kýrchatovtan kelgen oqýshylar júldeli úshinshi oryndy qanaǵat tutty. «Týǵan ólke soqpaqtary» atalymy boıynsha izdeý-zertteý jumystary jobalarynyń baıqaýy, «Ekologııalyq esep» prezentasııasyn qorǵaý, «Ekologııalyq soqpaq» baıqaýy, «Aralas týrızm» kross joryǵynda týǵan ólkeniń tabıǵatyn qorǵaýdy maqsat tutqan oqýshylar sheberlikterin kórsete bildi. Rıdder, Kýrchatov qalalary men Altaı, Zaısan, Borodýlıha aýdandarynan kelgen balalar da týrıstik ekspedısııa talaptaryna saı bilim men biliktilik tanytty.
– Shyǵystyń tabıǵaty ǵajap. Bul óńirde 2 myńnan astam ózen-kól, birneshe memlekettik qoryq ornalasqan. Ataqty Berel, Eleke sazy qorymdary, «Qyzyl kitapqa» engen qustardyń sany myńǵa jaqyn. О́ńirde týrıstik klaster damyp keledi. Bıyldyń ózinde Kendi Altaıǵa eki júz myńnan astam týrıs kelgen. Katonqaraǵaı aýdanyndaǵy О́rel mektebinde on shaqty jyldan beri gıd-reındjerler ázirleıtin synyp jumys istep tur. Olar shetelden kelgen týrısterge qyzmet kórsetedi. Al myna is-sharanyń mańyzy zor. Ol «Rýhanı jańǵyrý» baǵdarlamasy boıynsha júzege asýda. Oqýshylar óz aýdany, mekeni jaıly dıplom jumysyn qorǵady, sporttyq baǵdarlama, kompaspen jumys isteýdi meńgergen, taýǵa shyqqan kezde áriptesterine qalaı kómektesý jaıly da bilýi shart, – deıdi oqýshylardyń bilimi men biliktiligine saraptama jasaǵan Dáýlet Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń dosenti, tarıh ǵylymdarynyń kandıdaty Hansha Sovethanqyzy.
Slettiń úshinshi kúni jeńimpaz komandalar men úzdikter I, II, III dárejeli dıplomdarmen, kýboktarmen jáne medaldarmen, baǵaly syılyqtarmen marapattaldy. Jeńimpaz atanǵan komanda Aqmola oblysy, Býrabaı aýdany, Qotyrkól aýylyndaǵy, «Zvezdnyı» lagerinde ótetin respýblıkalyq baıqaýǵa qatysady. Komandalyq esepte Borodýlıha (1-oryn), Katonqaraǵaı (2-oryn), Altaı (3-oryn) aýdandarynyń komandalary júldeli oryndardy bólisti.
Ońdasyn ELÝBAI,
jýrnalıst
Shyǵys Qazaqstan oblysy,
Rıdder qalasy
