«Qazgıdromet» RMK Batys Qazaqstan oblystyq fılıaly 5 tamyz kúni oblys aýmaǵynda kúshti daýyl bolatynyn aldyn ala eskertken bolatyn. Keı jerlerde nóser tógip, jeldiń kúshi sekýndyna 15-20, tipti 23-28 metrge jetetini habarlanǵan.
Shynymen de búgin oblystyń ár aýmaǵynan qatty jelden zardap shekkender týraly málimet kelip jatyr.
Máselen, saǵat 16.15-te Qaztalov aýdany, Jańajol aýylynda qatty jeldiń saldarynan Jańajol orta mektebiniń 120 sharshymetr shatyryn jel julyp ketken.
16.30-da Jánibek aýylynda M.Ihsanov atyndaǵy kolledjdi sportzalynyń 24 sharshymetrlik shatyr jabyny ushyp tústi.
Saǵat 15.40-ta Tasqala aýdany ortalyǵyndaǵy Abaı kóshesi, 3-úıde ornalasqan Halyqty jumyspen qamtý ortalyǵynyń 25 sharshymetrlik shatyryn da jel kóterip, jerge túsirdi.
Qaztalov aýyly Sharafýtdınov kóshesi, 5 úıdegi «Qazposhta» AQ ǵımaraty da kúshti jel saldarynan 25 sharshymetr jylýustaǵysh qaptamasynan aıryldy.
Saǵat 17.20-da Mahambet О́temisuly atyndaǵy BQMÝ ǵımaratynyń alıýkobond qaptamasynyń bir bóligi qatty jelden qulap túsken.
- Turǵyndardan jelmen kóterilip, qulaǵaly turǵan shatyrlar men qaptamalar týraly da habar kelip jatyr. Mysaly Oral qalasyndaǵy Qambar batyr kóshesi, 6-úıdiń proflıst shatyry ushyp ketkeli tur degen habardy alǵan soń bizdiń 3 adamdyń jedel-qutqaorý jasaǵy attandy, - deıdi Batys Qazaqstan oblysynyń TJD Ishki jáne syrtqy kommýnıkasııalar tobynyń jetekshisi Jádiger Qusaıynov.
BQO Tótenshe jaǵdaılar departamenti turǵyndardy kúshti jelden qalaı qorǵaný qajettigi týraly nusqaýlyq taratyp jatyr.
Batys Qazaqstan oblystyq densaýlyq saqtaý basqarmasynyń málimetine qaraǵanda Oral qalasynda saǵat 15.00. pen 17.00. arasynda jedel járdem qyzmetine kúshti jel saldarynan jaraqat alǵan 5 adam habarlasqan.
Mysaly, Ábilqaıyr han dańǵylynda avtokólik ústine terek qulap, 1988 jyly týǵan jigittiń kózine jaryqshaq tıse, 2003 jyly týǵan qyz bala da jaraqatpen qalalyq kópbeıindi aýrýhanaǵa jetkizilgen.
Jelaev kentinde shatyrdan ushqan shıfer synyǵy 8 jasar qyzdyń basyna tıgen. Ol da qallyq kópbeıindi aýrýhanaǵa jetkizildi.
- Nazarbaev dańǵylynda synyp qulaǵan butaq basyna tıgen 69 jastaǵy áıel aýrýhanaǵa jatýdan bas tartty. Dál osyndaı jaǵdaıda basynan jaraqat alǵan 1945 jylǵy áıel aýrýhanaǵa jatqyzyldy, - deıdi BQO densýlyq saqtaý departamenti baspasóz hatshysy Aınagúl Saqbosynova.
Batys Qazaqstan
