510-den asa sportshy, 300-ge tarta jetekshi ókil qatysqan festıvalde komandalar báıge, kókpar, aýdaryspaq, teńge ilý, jamby atý, toǵyzqumalaq, asyq atý, qazaq kúresi, ulttyq jekpe-jek túrlerinen baq synady.
– Halqymyzdyń salt-dástúrin, bolmysy men rýhyn áıgileıtin búgingi uly dala oıyndary arqyly ulttyq tól ónerimizdi jas tolqynǵa jetkizý, sportymyzdyń mártebesin bıiktetý – barshamyzdyń zor mindetimiz. Elbasymyz Nursultan Nazarbaevtyń baǵdarlamalyq maqalalary barshany osyǵan úndeıdi. Ýaqyt ozǵan saıyn qarqyndy damyp jatqan álemdik jahandaný dáýirinde ultymyzdyń ulylyǵyn tanytatyn rýhanı qundylyqtarymyzdy keıingi tolqynǵa aman jetkizý - ult aldyndaǵy buljymas paryzymyz, - dedi festıvaldiń ashylý saltanatynda sóz alǵan Aqjaıyq aýdanynyń ákimi Qalııar Aıtmuhambetov.
Eki kúnge sozylǵan jarystyń alǵashqy kúni komandalar kókpar saıysyna tústi. Tasqala men Qaztalov, Jánibek pen Oral, Shyńǵyrlaý men Bórli, Aqjaıyq-Qaratóbe-Jańaqala komandaly arasynda ótken tartysty oıynda birinshi oryn – Oral qalasy komandasyna buıyrdy. Ekinshi oryndy – Jánibek aýdany shabandozdary alsa, úshinshi júldege alań ıeleri – Aqjaıyq aýdany kókparshylary ıe boldy.
Halyq taqymyn qysyp, erekshe jankúıer bolǵan saıystyń biri at jarys – báıge ekeni túsinikti ǵoı. 25 shaqyrymdyq alaman báıgede birinshi oryn - Jánibek aýdany júırigine, ekinshi oryn – Jańaqala, úshinshi oryn – Bókeıorda aýdanyna tıdi. 15 shaqyrymdyq toq báıgeniń júldesin Aqjaıyq, Bórli jáne Syrym aýdandary osy retpen bólisti. 7 shaqyrymdyq qunan báıgede Báıterek aýdanynan kelgen Manarbek Kenjeǵalıevtyń «Baıtóresi» - I oryn, Aqjaıyq aýdanynan qatysqan Syrym Sanaýlynyń «Kermaraly» - II oryn, qaztalovtyq Nurbolat Ádıetovtyń «Sultany» - III oryndy jeńip aldy.
Osy festıvalde 10 salmaq dárejesinde tuńǵysh ret ulttyq jekpe-jek básekeleri ótti. 6 saǵatqa sozylǵan jekpe-jek básekelerinde jalpykomandalyq jeńisti Bórli aýdany batyrlary tartyp aldy. Ekinshi oryn – Aqjaıyq aýdanyna, úshinshi oryn – Jánibek aýdany sportshylaryna tıdi.
Jalpy Batys Qazaqstan oblysynyń V festıvaliniń jalpykomandalyq esep qorytyndysy da osyndaı boldy. Bórli aýdany - festıval jeńimpazy atansa, ekinshi oryndy – Aqjaıyq aýdany sportshylary, úshinshi oryndy – Jánibek aýdany komandasy jeńip aldy. Jeńimpazdar men júldegerler alǵys hat pen baǵaly syılyqtarǵa ıe boldy.
Sýretti túsirgen Nurbek IHSAN
Batys Qazaqstan
