Áreket túbi – bereket

Al rýhy myqty adamdar olaı ezilip júrmeıdi. Joq jumysty ózi taýyp alady. Qyzylordaǵy О́ńirlik kommýnıkasııalar qyzmeti Jalaǵash aýdanyndaǵy shaǵyn jáne orta kásip jaıynda jaqsy jańalyqtarymen bólisti.

Máselen, Dáýirjan Qaırat degen jas jigit jumysty qaıdan tabamyn dep sary ýaıymǵa beril­mepti. Ol «О́ńirlik ınvestısııalyq ortalyǵynan» «Eńbek» baǵdar­lamasy arqyly 2 mln teńge kó­leminde jeńildetilgen nesıe resimdegen. Ol qarjyǵa on múıizdi iri qara satyp alǵan.

Aldymda mal bar eken dep jaý­daı tımeseń, jyldaǵy tólimen tez-aq kóbeıedi. Úsh-tórt jylda mal basyn otyzǵa jetkizgen Dáýirjan Qaırattyń búginde qaǵanaǵy qarq, saǵanaǵy sarq. Iri qaralaryn jemdep, jardaı bolǵan soń etke ótkizedi. Al saýyn sıyrlarynyń ónimderin satyp, eki jep, bıge shyǵyp otyr.

Eńbek baǵdarlamasy arqyly jeńil­detilgen nesıe alǵan Ba­ýyr­jan Ǵazızov ta mal basyn eselep kóbeıtip aldy. Endi ol qoıdan bólek, Zeńgi baba men Qambar ata túligin kóbeıtýge qam jasap ja­tyr. Aýylda tek mal baǵý arqy­ly tabys tabýǵa bolady degen uǵym durys emes. Jalaǵash aýda­ny­nyń týmasy Jeńis Qozy­baı­uly memlekettik baǵdar­la­ma­nyń kómegimen qonaqúı sal­ǵysy keledi. Ol aldymen «Bız­­nestiń jol kartasy-2020» baǵdarlamasy arqyly 2015 jyly 3 mln teńge kóleminde grant alady. «Jibek» qonaqúıin iske qosqan azamat jumysyn jandandyrý úshin araǵa úsh jyl salyp taǵy 6 mln teńge alady. Qonaqúıdi salý shyǵyny 30 mln teńge bolǵan eken. Munda barlyǵy 9 nomer bar. Onyń ekeýi lıýks, jeteýi standartty bólmeler. Shaǵyn qonaqúı qo­naq­tardan bosamaıdy. Aýdanǵa kún elektr stansasyn salýǵa Gre­kııa­dan kelgen mamandar osy qo­naqúıdiń qyzmetin paıdalanyp jatyr.

Al Nurgúl Ǵabıdenqyzy bala­baqsha bıznesinen bere­ke kórip otyr. Ol ótken jyly «Qy­zyl­orda óńirlik ınves­tı­sııa­lyq ortalyǵy» JShS «Mık­ro­­bız­nes Qyzylorda» baǵdar­la­masy ar­qy­ly 3 mln teńge kóleminde nesıe alǵan. Nesıe qarjysyna «Báıt» atty jańa balabaqsha ash­qan. Bilim úıinde 1-3 jas, 3-6 jas aralyǵyndaǵy eki top tárbıe­lenedi, arnaıy oıyn alańdary bar. Mektepke deıingi tárbıe uıymyn basqaratyn kásipker 12 adamdy jumyspen qamtyp otyr.

Osy Jalaǵash aýdanynda sha­ǵyn jáne orta kásipkerlik sýbek­tileriniń sany 2340 birlikke jetken. Búginde onyń 89,1 paıyzy naqty jumys istep tur. Shaǵyn aýdan úshin bul jaqsy kórsetkish.

Qyzylorda oblysy