10 tamyzda elordada «Saý júrek aılyǵy» jylsaıynǵy qaıyrymdylyq velosherýi ótedi.
«Saý júrek aılyǵy» qaıyrymdylyq sharasynyń basty uıymdastyrýshysy «Ulttyq ǵylymı kardıohırýrgııa ortalyǵy» AQ bastamasymen qurylǵan «Júrek ortalyǵy» korporatıvtik qory. «Júrek ortalyǵy» qory – klınıkada ǵylymı jáne bilim berý qyzmetin damytý jáne jalpy, Qazaqstan boıynsha kardıohırýrgııalyq qyzmetti jetildirý maqsatynda qurylǵan elimizdegi osyndaı alǵashqy jáne jalǵyz qor.
Sharaǵa donorlyq júrek salynǵan pasıentter men osy biregeı operasııalardy jasaǵan dáriger Iýrıı Pıa bastaǵan mamandar da atsalysady. Sherýge qatysýshylar Kereı-Jánibek handar kóshesimen jáne Turan dańǵylymen júrip ótedi. Uzyndyǵy 12 shaqyrymdy quraıtyn marshrýt Ulttyq ǵylymı kardıohırýrgııa ortalyǵynyń turaǵynan (Turan dańǵ., 38) bastalyp, Turan dańǵylymen «Astana juldyzdary» monýmentine deıin (Qabanbaı batyr dańǵylyndaǵy aınalma jol) jalǵasady. Qatysýshylar osy jerden keri burylyp, Turan dańǵylymen Ulttyq ǵylymı kardıohırýrgııa ortalyǵyna deıin júredi.
Márede baǵaly syılyqtar utysy uıymdastyrylady, al jınalǵan qarjy kardıohırýrgııa salasyndaǵy bilim men ǵylymdy damytýǵa baǵyttalady.
Qatysýshylardyń qaýipsizdigin qamtamasyz etý maqsatynda velosherý barysynda atalǵan kóshelerde kólik qozǵalysy jartylaı shekteledi. Aıta keteıik, qashyqtyqty baǵyndyrýǵa 60 mınýt ýaqyt beriledi.
Velosherýge 16 jastan asqandardyń barlyǵy qatysa alady, ol úshin «Júrek ortalyǵy» korporatıvtik qorynyń www.hcenter.kz saıtynda tirkelý kerek. Birinshi bolyp tirkelgen 300 qatysýshyǵa qordyń fırmalyq belgisi bar zattardan syılyqtar tabystalady. Tirkelý jáne tolyq aqparat www.hcenter.kz saıtynda. Tirkelý quny - 5000 tg.
