Resmı aqparat boıynsha, arnaıy jasaq ókilderi A.Atambaevtyń rezıdensııasyn qorshap, halyqty jibermedi. Alaıda A.Atambaevtyń jaqtastary jetekshisin qorǵap, qarýly kúshter ókilderine oq atty. Nátıjesinde, 52 adam jaraqat aldy, bir arnaıy jasaq qyzmetkeri kóz jumdy, 6 jaýyngerdi tutqynǵa aldy. Memlekettik ulttyq qaýipsizdik komıtetiniń basshysy Orozbek Opýmbaev eks-prezıdent jaqtastary komıtet qyzmetkerlerinen 55 dana qarý tartyp alǵanyn málimdedi.
Almazbek Atambaev halyqqa beıne joldaýynda arnaıy jasaq ókilderine ózi oq atqanyn, halyqtyń buǵan qatysy bolmaǵanyn aıtty. Sonymen qatar, bıliktegilerdiń bul áreketin bassyzdyq dep oılaıtynyn jetkizdi.
8 tamyzda Jogarký Keńeshtiń kezekten tys sessııasynda A.Atambaevty tutqyndaý máselesi talqylandy. Qyrǵyz Respýblıkasynyń prezıdenti S.Jeenbekov «bul eki kóshbasshy arasyndaǵy qaqtyǵys emes, eldegi jemqorlyqty toqtatýǵa negizdelgen kúres» degen málimdeme jasady. Dál osy otyrysta Memlekettik ulttyq qaýipsizdik komıtetiniń basshysy Orozbek Opýmbaev bul oqıǵa qatysty kinásin moıyndap, memleket basshysynan ózin qyzmetten bosatýdy surady. Alaıda prezıdent onyń ótinishin qabyldamaı, operasııany jalǵastyrý keregin aıtty.
Akipress agenttigi 8 tamyz jergilikti ýaqyt boıynsha 16:20-da eks-prezıdent úıiniń qasyna 500-ge jýyq adam jınalyp, Besh-Kúngeı aýylyna qaraı bet alǵanyn málimdedi. Al 16:23-te mılısııanyń ekinshi shabýyldy bastaǵanyn habarlady. A.Atambaevtyń jaqtasy Farıd Nııazov granatalardyń laqtyrylǵanyn aıtty. Japa shekkender týraly ázirge habar joq.
