QR OSK baspasóz qyzmetiniń málimetinshe, aqparattyq-kommýnıkasııalyq saılaý ınfraqurylymyn, onyń ishinde saılaýshylardyń biryńǵaı elektrondyq tizilimin qurýmen, basqarýmen jáne paıdalanýmen 2005 jyldan bastap Ortsaılaýkomnyń vedomstvolyq baǵynysty uıymy – «Ortalyq saılaý komıssııasynyń Injenerlik – tehnıkalyq ortalyǵy» RMK aınalysady.
«Saılaýshy-azamattardyń biryńǵaı elektrondyq tizilimi Ortalyq saılaý komıssııasynyń serverlerinde ornalasqan, olar aqparatty qorǵaýdyń barlyq sharalaryn kózdeıdi jáne syrtqy qosylystary joq, onyń ishinde Internet jelisine qosylmaǵan. Osylaısha, OSK serverlerinen derekterdiń taralyp ketýi múmkin emes.
Ortalyq saılaý komıssııasy saılaýshylardyń derbes derekterin taratý qaýpi týraly jarııa alańda baıandalǵan faktiler boıynsha qyzmettik tekserý júrgizdi. Qupııa aqparattyń jaıylýyna ákep soǵýy múmkin Ortalyq saılaý komıssııasynyń serverlerine ruqsatsyz qol jetkizý áreketterin tekserý nátıjeleri boıynsha anyqtalǵan joq», delingen resmı habarlamada.
Ortsaılaýkomnyń málimdeýinshe, bul rette «QR OSK ITO» RMK merdigerlik uıymynyń aqparattyq-taldaý júıesiniń fýnksıonalyn jetildirý boıynsha jumys barysynda derekterdi komprometasııalaý kózi bola alatyn ázirleý serverin paıdalanǵandyǵy anyqtalǵan.
«Qyzmettik tekserý nátıjeleri, sondaı-aq «QR OSK ITO» RMK tapsyrysy boıynsha jumystar keshenin júzege asyrǵan merdigerlik uıymnyń qyzmetine qatysty materıaldar ýákiletti organdarǵa berildi. IIM júrgizgen sotqa deıingi tergeý sheńberinde bolǵan oqıǵanyń barlyq mán-jaılaryn anyqtaýǵa belsendi kómek kórsetiledi», delingen habarlamada.
Sonymen qatar bıyl aqparattyq qaýipsizdikke qatysty qosymsha sharalar qabyldanyp, eki márte aýdıt júrgizilgen. Atap aıtqanda, Memlekettik tehnıkalyq qyzmeti aqpan aıynda, OSK bastamasy boıynsha «SARKA» zańdy tulǵalar birlestigi jasaǵan memorandým negizinde maýsym aıynda aýdıt júrgizilgen.
«SARKA» ZTB belgilengen yntymaqtastyq sheńberinde aqparattyq júıelerdiń keshendi aýdıtin, syrtqy jáne ishki testileýdi júzege asyrdy, qaýipsizdik qaterlerine baılanysty táýekelderdi taldaýdy jáne baǵalaýdy júrgizdi jáne t.b.
Aqparattyq qaýipsizdik aýdıtiniń qorytyndylary boıynsha 2019 jylǵy 6 maýsymdaǵy «SARKA» ZTB esebi qoljetimdiligi shekteýli aqparattyń, onyń ishinde saılaýshylardyń derbes derekteriniń taralyp ketý qaýpi men osaldyǵyn anyqtaý týraly derekterdi qamtymaıdy. Esepte qamtylǵan aqparattyq qaýipsizdik sharalaryn kúsheıtý jónindegi usynymdar tolyq kólemde ýaqtyly iske asyryldy», delingen habarlamada.
