Kóńildi sharaǵa Almaty, Taldyqorǵan qalalary men Alakól, Sarqan aýdandarynan kelgen jas otbasylar qatysty. Úsh kúnge sozylǵan sharanyń ár táýligi tańǵy jattyǵýmen bastaldy. Juptar arasyndaǵy jarys eki kezeńge bólinip, qatysýshylar aldymen demalys ornynyń aýmaǵynda saıysqa tústi. Bul jerdegi dodalar «Juptar jarasymy», «Tátti dáýren», «Tereń tynys», «Kim mergen?», «Oılan tap», «Tapsyrma hat» syndy arnaıy bólimderden turdy.
- Bul shara «Jastar jyly» aıasynda keıingi tolqyn ókilderiniń arasyndaǵy dostyq qarym-qatynasty bekitý, olardyń básekege qabilettiligin arttyrý, jazdyń jaıma-shýaq kúnderin kóńildi ótkizý maqsatynda uıymdastyryldy. Osydan biraz ýaqyt buryn «Alakol TV» aqparattyq-tanymdyq telestýdııasyn ashqan bolatynbyz. О́ńirdiń, ólkeniń jańalyǵyn ınternet arqyly jarııalaımyz. Endi qoǵamdyq sharalar ótkizýdi qolǵa aldyq. Aldymyzǵa Alakól týrızminiń damýyna úles qossaq degen maqsat qoıdyq. «Alakol Life» realıtı-shoýy osylaı bastaldy. Ári óte qyzyqty ótti. Máselen, «Juptar jarasymy» bólimine qatysýshylarǵa serigi jaıynda suraqtar qoıylyp, olardyń óz juptaryn jiti tanýlary tarazy basyna tústi. Kelesi tórt bólim úmitkerlerdiń kóńilin kóterý men juptyq jumystyń mańyzylyǵyn kórsetýge baǵyttaldy. Al sońǵy «Tapsyrma hat» synynda qatysýshylar qarsylastaryna arnaıy tapsyrma berip, olardyń sol mindetti oryndaý sheberlikteri saralandy. Ekinshi kezeń kól boıyndaǵy kóńildi saıystarmen jalǵasyn tapty. Bunda jas juptar aldymen «Kim birinshi?» atty synda kólden sý tasyp, arnaıy ydysty toltyrsa, «Kim júırik?» kezeńinde katamarandardy tizgindegen jastar belgilengen mejege deıin jarysyp, máreden birinshi kóriný úshin barlaryn saldy. Sonymen qatar «Selfı» kezeńinde qatysýshylar arnaıy ýaqyt ishinde demalýshylarme eń kóp selfı jasaý boıynsha tartysqa tústi. Al bul dodalardyń eń qyzyqtysy juptar arasyndaǵy arqan tartys boldy. Artynsha jas juptar sý kólikterine otyryp, kúnniń qalǵan bóligin kól betinde ótkizdi, - deıdi jas jýrnalıst, «Alakol TV» aqparattyq-tanymdyq telestýdııasynyń jetekshisi Almat Esenbekov.
Saıys jeńimpazdaryn Almaty oblystyq jastar resýrstyq ortalyǵynyń dırektory Jaıyq Tazabekuly quttyqtap, baǵaly syılyq tapsyrdy.
Almaty oblysy
