Jýyrda «Qymyzfest» festıvali aıasynda osy oıyn boıynsha ashyq birinshilik uıymdastyrylyp, Nur-Sultan, Kókshetaý, Petropavl qalalarynan jáne óńir aýdandarynan ókilder qatysty.
«Botaı» ulttyq oıynynyń avtory, «Qyzyljar jastary» qoǵamdyq birlestiginiń tóraǵasy Erlik Muhamedjanov bastapqyda umyt bolǵan ulttyq sport túri – saqa oıynyn jańǵyrtýdy maqsat etip, birneshe jyl boıy óz betinshe izdengen. Aýyl aqsaqaldaryna jolyǵyp, aqparat jınastyrǵan. Aqyry saqa oıyny negizinde birqatar ózgerister engize otyryp «Botaı» oıynynyń erejesin qurastyryp shyqqan. Máselen, ony kez kelgen jerde oınaı berýge bolady. Jylqy men iri qara malynyń topaı súıekteri bolsa jetkilikti. Sosyn tek er adamdar ǵana qatysady. «Asyq atý» alańy sheńberlerden quralsa, munda tik tórtburyshtardan turady. Ázirge óńirge tanymal ulttyq brend sanalǵanymen, respýblıkalyq deńgeıde jańǵyrtýdyń múmkindikteri mol. Tipti ol IýNESKO tizimine engizýdi de josparlap qoıypty.
«Qambar ata túligi alǵash ret qolǵa úıretilgen Aıyrtaý aýdanyndaǵy Botaı turaǵyn qazir álem ǵalymdary men arheologtary jaqsy biledi. Qazba jumystary barysynda jylqy malynyń topaı súıekteri men tilersekteri kóptep tabylǵan. Soǵan qaraǵanda olarmen túrli oıyndar oınalǵan bolý kerek degen boljam bar. Asaýǵa alǵash buǵalyq salynǵan jerdiń qurmetine «Botaı» degen ataý berilip, «Rýhanı jańǵyrý» baǵdarlamasy aıasynda barynsha ulttyq boıaýǵa qanyqtyryp, jańasha qyrynan damytýdy, qundylyqtarymyzdy barynsha nasıhattaýdy maqsat etip otyrmyz. О́zimiz bala kezimizde shańǵa kómilip oınaıtynbyz. Bizden keıingi tolqynnyń saqaǵa áýestengenin kórmeppin. Mektepterde úıirmeler ashyp, oıynnyń erejesin, ádis-tásilderin oqýshylarǵa úıretemiz. Osydan bir aı buryn óńirimizde asyq atýdan respýblıkalyq chempıonat ótip, bizdiń bastamamyz asyq atý federasııasy basshylyǵy tarapynan qoldaý tapqan bolatyn», deıdi budan ózge ıgi isterge de qozǵaý salyp júrgen Erlik baýyrymyz.
Jarystyń bas tóreshisi Qýat Haırýlınniń aıtýynsha, «Botaı» oıyny kúsh-jigerdi, qyraǵylyqty arttyryp, eptilikke, mergendikke, shapshańdyqqa baýlıdy. Oıynshy únemi qımyl-qozǵalysta júrgendikten qan aınalymy jaqsarady, denesi shynyǵady. Jarystyń erejesi boıynsha ár oıynshynyń eki dıi, bir saqasy bolady. Oıyn alańynda qaz-qatar tizilgen dılerdi saqamen kózdep atyp, syzyqtan ushyryp shyǵarý kerek. Petropavldyq Áset Demesinov úsh partııanyń ekeýinde qarsylasynan basym túsip, qorytyndy esepte birinshi orynǵa kóterildi. Ekinshi oryn kókshetaýlyq Samat Áýkenovke buıyrdy. Nur-Sultan qalasynan kelgen Eskendir Rahmetov úshinshi oryndy mise tutty.
Budan bólek «Úzdik surmergen», «Kórermender kózaıymy», «Jeńiske degen umtylysy úshin» atalymdarynyń jeńimpazdary anyqtalyp, baǵaly syılyqtarmen, dıplomdarmen marapattaldy.
Soltústik Qazaqstan oblysy
