Qazaqstannyń Sút odaǵynyń (QSO) bastamasymen uıymdastyrylǵan alqaly basqosýda sút shıkizatyn Keden odaǵynyń tehnıkalyq reglamentter talaptaryna beıimdeý, salalyq Jol kartasyn túzip, iske asyrý máseleleri talqylandy. QSO baǵdarlamasynyń úılestirýshisi Sáýle Jankınanyń aıtýynsha, Keden odaǵynyń jańa talaptary boıynsha qaıta óńdeletin sút shıkizaty qaýipsizdik tehnıkalyq reglamenterine yńǵaılanýy tıis. QSO derekterine qaraǵanda qaıta óńdeletin shıkizattyń 700 myń tonnaǵa jýyǵy jarııalanǵan talaptarǵa múldem saı emes. Kelesi jyldan bastap jańa sharttarǵa sáıkes kelmeıtin sút ónimderin óńdeý kásiporyndary qaıta qabyldamaıdy. Sút zaýyttary shıkizattyń 70 prosentten astamyn eldi mekenderden jınaıdy. «Jol kartasy sút shıkizatynyń qaýipsizdigi men sapasyn qamtamasyz etýge baǵyttalǵan. Sút odaǵy kóptegen jyldar boıy Keden odaǵynyń reglamentterine kóshý boıynsha josparly jumys júrgizgen. Turǵyndarmen, sút daıyndaýshylarmen jáne tapsyrýshylarmen aqparattyq-túsindirý sharalary atqarylǵan. Alaıda, salada qalyptasqan problemalar bıznestiń ǵana emes, basqa da taraptardyń júıeli jáne belsendi qatysýyn talap etedi.
«Bıznes ókilderi memlekettik organdarmen shıkizat pen shıkizat bazasy boıynsha barlyq túıindi problemalardy talqylaýǵa, birlesip sheshýge daıyn. Shıkizat bazasynyń aýdıtine fermerler qosylýǵa saqadaı saı. Bizdi 5 mıllıon tonna súttiń 75 prosenti Keden odaǵynyń tehnıkalyq reglamenttik talaptaryna sáıkes kelmeıtini alańdatady», dedi Qazaqstan Sút odaǵynyń atqarýshy dırektory Vladımır Kojevnıkov.
Jol kartasy eki kezeńde júzege asyrylatyn bolyp belgilengen. Birinshi kezeńde Sút odaǵyna múshe kásiporyndar, ekinshi kezeńde Qazaqstannyń barlyq aımaqtaryndaǵy sút óndirýshiler qamtylmaq. Osylaısha shıkizattyń tazalyǵyn qamtamasyz etý sút óńdeý sektory úshin basym baǵdarǵa aınalatyn bolady. Búginde eki mıllıondaı qazaqstandyq sút ótkizýmen aınalysyp, aýyldyqtar úshin birden-bir tabys kózi sanalady.
Soltústik Qazaqstan oblysy
