Ormandy alqaptardyń ózi de osyndaı kúıge ushyraýda. Sondyqtan dala órtiniń qaýpi ýshyǵyp tur. Ereımentaý aýdanyna qarasty Qoıtas selolyq okrýgindegi Masaqbaı jaıylymynyń mańy órtenip jatyr. Aldyn ala esepteýge qaraǵanda tilsiz jaý qazirdiń ózinde 280 gektar jerdi jalmap ketken. Oblystyq tótenshe jaǵdaılar departamenti jedel shtab quryp, órtti sóndirý baǵytynda qaýyrt jumys isteýde. О́rt sóndirýge departamenttiń 12 tehnıkasy men jeke quramnyń 52 adamy, orman sharýashylyǵynyń 3 tehnıkasy men 14 jumysshysy, sondaı-aq, órt sóndirýge qolǵabys etýge kelgen eriktilerdiń 22 tehnıkasy men 120 adamy jumyldyrylǵan.
О́rt qaýpi molaıǵan shaqta 30 márte orman órti shyqqandyǵyn, 207 gektar alqaptaǵy qurǵaq shóptiń tutanyp, 59 órt oqıǵasy tirkelgendigin aıta ketelik. О́rt qaýipsizdigi talaptaryn buzǵan 46 adam jaýapqa tartylyp, oblys turǵyndary arasynda qaýipsizdik sharalaryn qatań saqtaý qajettigi qansha márte aıtylsa da, keıbireýler áli de salǵyrt qaraýda. Qazir sóndirilmeı tastalǵan temeki tuqylynyń ózi tabıǵatqa orasan zor shyǵyn ákeledi. Qaıyńy men qaraǵaıy qaýlaı ósken Birjan sal aýdanynyń ormandaryn segiz márte órt shaldy. Al Býrabaıdyń qaıtalanbas sulý dıdaryna kireýke túsirgen 5 órt oqıǵasy boldy.
Alda oraq naýqany. Ol kezde de órt qaýpi eselene túsedi. Sondyqtan, jol jıegindegi jolaqtyń enin úlkeıtip, tórt metrge jetkize jyrtqan jón. Aýyl sharýashylyǵy qurylymdarynyń basshylaryna eskertilip, máseleniń mánisin uǵyndyrsaq, dalanyń dıdaryn saqtap qalamyz.
