Uly Dala jerine saıahatty Qazaqstan men Aýstrııa elshilikteri, Qazaq geografııalyq qoǵamy uıymdastyryp otyr. Qazaqstannyń eýropalyq dostary Ulytaý, Qarqaraly, Shyńǵystaý, Alakól, Altyn Emel men Balqash óńirlerin aralady. Ekspedısııaǵa Qazaqstannyń belgili jıhangezi, Qazaq geografııalyq qoǵamynyń múshesi, «Qazaqstannyń 100 jańa esimine» engen Maǵjan Saǵymbaev jetekshilik etken. Ol osydan tórt jyl buryn jer sharyn velosıpedpen aralap shyqqan bolatyn.
«Ulytaýda júrgenimizde ekspedısııamyzǵa EQYU-nyń Qazaqstandaǵy elshisi Djordj Sabo men Shveısarııa elshisi O.Smıt qosyldy. Joshy han men Alasha hannyń, Dombaýyldyń kesenesin aralap, Qarqaraly ulttyq parkinde de boldyq. Shaıtankól dostarymyzǵa qatty unady. Keıin Jıdebaıdaǵy Abaı mýzeıin tamashaladyq. Jıdebaıda EQYU Parlament Assambleıasynyń burynǵy prezıdenti Krıstın Mýttonen Abaıdyń «Jaz» óleńin nemis tilinde oqyp, uly aqynnyń 175 jyldyǵyna oraı bastalǵan chellendjdi jalǵastyrdy», dedi Maǵjan Saǵymbaev.
Aýstrııalyq qonaqtar Gerold Belger aýdarǵan Abaıdyń «Jaz» óleńiniń kóshirmesin Abaı mýzeıine tapsyrypty. Tili bólek, dini basqa qonaqtardyń bul qareketin qazaqtyń birtýar aqynyna kórsetken qurmet dep bilsek bolatyndaı.
Delegasııa quramynda sheteldik týrıstermen birge Qazaqstannyń Aýstrııadaǵy Tótenshe jáne О́kiletti elshisi Qaırat Sarybaı, Parlament májilisiniń depýtaty Sapar Ahmetov, Qazaqstannyń Baden-Vıýrtemberg jerindegi Qurmetti konsýly Doroteıa Haller-Lıaıble men jary Iýrgen Lıaıble, Aýstrııa-Qazaqstan qoǵamynyń prezıdenti, EQYU Parlament Assambleıasynyń burynǵy prezıdenti Krıstın Mýttonen jáne onyń jary Pekka Mýttonen boldy.
