Teńiz deńgeıinen 1500 metr bıikte ornalasqan, tabıǵaty tamasha taýly ólkege jazǵy demalys maýsymynda arnaıy kelip, saýmalmen emdelýshilerdiń qatary kóbeıip kele jatyr. Osyny kózimizben kórip, kóńilimiz qýandy. Bul – ulttyq sýsynymyzdy qurmetteý. Qarabulaq aýyldyq okrýgine qarasty Qarabulaq aýylynyń etek jaǵynda «Bereke» atty saýmalmen emdeıtin demalys orny bar. Teginde Qarabulaq óńiri – jasyl shyrshasy, burqyraǵan arshasy, tańǵajaıyp tabıǵaty sán bergen, ár bergen taýly óńir. Áıgili Kólsaı kólderine baratyn kúre joldyń boıyna ornalasqan. Taýdan tómen qulaı aǵyp jatqan móp-móldir bulaqtaryn, jasyl quraqtaryn aıtsańshy! Aýyldyń etek jaǵyndaǵy Dıirmen dep atalatyn jerdegi saýmalmen emdeıtin demalys ornynyń ashylǵanyna 5 jyl bolǵan. Onyń ıesi erli-zaıypty Baqytjan men Uldaı Aldııarbaevtar. Baqytjannyń mamandyǵy – agronom. Bilimdi, eńbekqor azamat toqsanynshy jyldary sharýashylyqtar taraǵan kezde qol qýsyryp qarap otyrmaı, 1992 jyldan bastap osy óńirden 16 gektar jer alyp, sodan beri sharýa qojalyǵynyń irgesin keńeıtip keledi.
Qazirgi jaǵdaılary jaman emes. Aýyldan bir shaqyrymdaı ǵana jerdegi demalys orny bizge birden unady. Bir jaǵynda aryndy taý ózeni sarqyraı aǵyp jatyr. Erli-zaıypty eńbekqor jandar qonaqtar qona jatyp demalatyn birneshe ǵımarat turǵyzǵan. Munda jıyrma adamnyń aptalap saýmalmen alańsyz emdelip qaıtýyna tolyq múmkindik bar.
Erli-zaıypty eńbekqor jandar demalys ornynyń aınalasyna túrli jemis aǵashtaryn egip qoıǵan eken. Alma, qara órik, sary órik, qyrǵyzdyń qaraqaty jaıqalyp tur. Eki taýdyń ańǵaryna ornalasqan demalys ornynyń saf taza aýasynyń ózi tánge qýat berip, jandy sergitedi. Ynta-yqylasy aýǵandar bir ýaq ózen jaǵalap balyq aýlaıdy. Monsha da bar.
– Byltyr «Bastaý Bıznes» jobasyna qatysyp, arnaıy sertıfıkat aldym. Qolǵa alǵan sharýamnyń irgesin keńeıtý úshin oblys ákiminiń grantyna qatystym. Sóıtip 2 mln teńge granttyń ıesi atandym. Bul bizge úlken qoldaý boldy. Jańadan 10 adamǵa arnalǵan demalys ornyn saldyq. Qonaqúıge arnalǵan qural-jabdyqtar satyp aldyq. Munda kelýshilerge barlyq jaǵdaı jasalǵan, meımandarymyzdyń kóńilderi tolyp, jaqsy kóńil kúımen qaıtady, – deıdi Uldaı Aldııarbaeva.
Ras, tal-teregi, jasyl quraǵy, taý ózeni kórik bergen óńirdiń tańǵy salqyn saýmal taza aýasynyń ózi demalýshylardyń janyn emdeıdi. Munda sonaý Nur-Sultannan, Aqtaý men Oraldan, Almaty men Talǵar qalalarynan arnaıy keletin turaqty qonaqtary da barshylyq eken.
Baqytjan jetekshilik etetin «Bereke» sharýa qojalyǵynda úıirli jylqy, tabyn sıyr, biraz qoı-eshki bar. Jatyp demalýshylarǵa qajetti qurt, sary maı, irimshik, bári osy jerde daıyndalady. Munda jumys tańǵy 5-ten bastalyp, túnniń bir ýaǵyna deıin tolastamaıdy eken. Demalys ornyna jaqyn jerdegi jelide 10 bıe baılaýly. Jańa saýylǵan saýmaldyń qyshqyltym ıisi burqyraǵan orynǵa arnaıy baryp, qymyz ishetinder az emes. Bal tatyǵan dámdi de sapaly sary qymyz janyńdy jadyratyp, ańsaryńdy odan saıyn asha túsedi. Erli-zaıypty Baqytjan men Uldaıdyń beldi kómekshileri Baǵlandaı uldary men Perızattaı kelinderi. Bári besaspap. Bıe, sıyr saýý sııaqty jumystardy kezektese atqara beredi. Bir jarasym ornaǵan jer.
Ulttyq sýsynymyzdy ulyqtaǵan, saýmaldyń emdik qasıetine demalýshylarynyń kózin jetkizip, alǵys arqalap kele jatqan Baqytjan men Uldaıdyń sharýashylyǵyna dán rıza boldyq.
Jalpy, qymyzdyń janǵa shıpa, tánge qýat beretin emdik qasıeti mol ekeni medısınada da, halqymyzdyń ómirlik tájirıbesinde de ábden dáleldengen. Biz tilge tıek etip otyrǵan sharýashylyq ulttyq sýsynymyzdyń qadirin arttyryp, kásipke aınaldyryp, elge de, otbasyna da paıdaly ıgi ispen shuǵyldanyp otyr.
Qanat BIRJANSAL
Almaty oblysy
