Atalǵan kórmeniń ereksheligi sol, jergilikti fotosýretshiler bir kún ishinde qaraǵandylyqtardyń kúndelikti ómiri men qalanyń kórnekti jerlerine jatatyn ǵımarattar men eskertkishterdi, kósheler men gúlzarlardy sýretke túsirgen bolatyn. Kórmeni uıymdastyrýshylar kenshiler astanasynyń 85 jyldyq datasyna oraılastyryp, álgi sýretterdiń ishinen 85 týyndyny tańdap aldy.
Jalpy, «Rýhanı jańǵyrý» baǵdarlamasy aıasynda uıymdastyrylǵan bul shara dástúrli «Biz – qaraǵandylyqtarmyz» festıvaliniń bir bóligine jatady. Kórmege qajetti qarajat qalalyq bıýdjetten memlekettik áleýmettik tapsyrys aıasynda bólindi.
– Bul degenińiz bar bolǵany bizdiń jerlesterimizdiń ómirinen alynǵan bir kún. Men ony tipti bylaı dep te tujyryp aıtar edim: eger fotoapparattyń árbir kadry – bir sekýndtyń alpystan bir bóligi bolsa, onda bul kórme bir jarym-eki sekýndtyń ishine syıyp ketedi. Biraq osy qas-qaǵym sáttiń ózinde fotosýretshiler kóp nárseni kórsete aldy. Olardyń kózqarasy men sheberliginiń arqasynda kórermender qalanyń ómirin túrli qyrynan kórýge múmkindik aldy, – deıdi TEFAEurasiaphoto shyǵarmashylyq birlestiginiń múshesi Iýrıı Varygın.
Atalǵan kórmeni uıymdastyrýǵa Qaraǵandy qalasynyń ákimdigi men Qaraǵandy oblysynyń kásipkerler qaýymdastyǵy qoldaý kórsetti. Olar sátti bastalǵan bul joba jyl saıyn ótip tursa degen tilek aıtty. Mysaly, «Biz – qaraǵandylyqtarmyz» jobasynyń jetekshisi, oblystyq kásipkerler qaýymdastyǵy basshylarynyń biri Gúlnár Qurbanbaeva kórmedegi sýretter arqyly kenshiler astanasynyń kelbetin basqa qyrynan kórip, erekshe áser alǵanyn rızashylyqpen jetkizdi.
– Bul sýretter arqyly men Qaraǵandyny basqa qyrynan tanydym. «Toqtaı tur mezet, sen netken ǵajapsyń!» dep beker aıtylmaǵan ǵoı. Osy kórmeni tamashalaǵan qaraǵandylyqtar týǵan qalasyn odan ári súıe túsetinine senimdimin. О́z basym «Qaraǵandy ómiriniń bir kúni» atty bul kórmeniń jyl saıyn ótetin dástúrli sharaǵa aınalýyna qýana daýys berer edim, – dedi ol aǵynan jarylyp.
«Qaraǵandy ómiriniń bir kúni» fotokórmesi oblystyq beıneleý óneri murajaıynda 12 tamyzǵa deıin jalǵasady.
QARAǴANDY
