Komıtet tóraǵasy byltyrǵy jylmen salystyrǵanda kiris kólemi 556 mlrd teńgege nemese 115%-ǵa artyq túskenin aıtady. Respýblıkalyq bıýdjettiń kólemi 101%-ǵa jáne jergilikti bıýdjet 108%-ǵa ósken. Shaǵyn jáne orta bıznesten el qazynasy 1, 9 mlrd teńgege nemese 16,6%-ǵa toldy. Buǵan qosa vedomstvo basshysy alǵashqy jartyjyldyqta Qarjy monıtorıngi komıtetine qarasty Ekonomıkalyq tergeý qyzmetin qaıta qurý jáne kadrlyq aýys-túıiske baılanysty jumystar aıaqtalǵanyn sabaqtady.
Sonymen qatar Memlekettik kirister komıteti úlken derekter tehnologııasyn meńgerýdi bastapty. Bul ásirese táýekel modelin boljaýda taptyrmas qural dedi spıker.
– Eksportty baqylaý bólimshesi quryldy. Onyń tıimdiligi kórine bastady. Búginde komıtet ujymy jasaqtalǵan jáne tapsyrmalardy oryndaýǵa daıyn. Úlken derekterdi saraptap, málimetterge ıntellektýaldy taldaý jasaıtyn tyń júıeni qoldanýdy bastadyq. Sonyń negizinde táýekel modelderi ázirlenip jatyr. 14 jańa model júzege asyryldy. Onyń 11-i salyq isine jáne 3-eýi keden baǵytyna qatysty, – dedi M. Sultanǵazıev.
Budan bólek spıker jyl basynan bastap elektrondy shotfaktýrany mindetti túrde paıdalaný engizilgenin aıtty. Sol sekildi qazir shekaradan ótýge qatysty másele kóp ekenin jasyrmady. Ol kedendik deklarasııa boıynsha taýar aınalymy 100%-ǵa kóbeıgendikten elektrondy túrde rásimdeletinin, biraq shekarany ótý tártibi qaz-qalpynda qalǵanyn jetkizdi.
