Turǵyn úı sertıfıkattary bastapqy jarnanyń 90 paıyzyn quraıdy

Bekitilgen normatıvter men erejelerge sáıkes, tur­ǵyndarǵa sertıfıkat­tar berý­diń eki túri qarastyrylǵan. Onyń alǵashqysy – áleýmettik kó­mek, ekin­shisi – áleýmetik qoldaý. Osy oraıda Aqtóbe oblysynyń ákimdigi men más­lı­haty salalyq mınıstrlik ta­rapynan bekitilgen arnaý­ly erejege sáıkes, shu­ǵyl, qa­rymdy is-qımyl tanytty. Bul máse­le Aqtóbe oblystyq más­lı­hatynyń ke­zekten tys sessııasynda qaralyp, «Baqytty otbasy» jáne «Nurly jer» baǵdarlamalaryna qatysý­shy­larǵa beri­letin turǵyn úı sertıfıkattarynyń mól­sheri bekitildi. Sonymen birge ony alý­shylardyń sanattary men tizbesi anyqtaldy.

Osy jerde aıta keterlik másele, búgingi kúni oblys boıynsha memlekettik tu­rǵyn úı qorynan turǵyn úı alý úshin onyń kezeginde 30 myńnan as­tam azamattyń turǵandyǵy. Munyń ishin­de 10 815 adam «Baqytty otbasy» baǵ­dar­lamasyna qatysýǵa úmitkerler qa­tarynan oryn alǵan. Olarǵa qaı­tarymsyz beriletin turǵyn úı sertıfkaty bastapqy jarna somasynyń 90 paıyzyn quraıdy. Mysaly, quny 10 mıllıon teńge turatyn turǵyn úıdi satyp alý úshin ony alatyndar sanaty­na engizilgen alqa múgedek balalary bar nemese olardy tárbıeleýshi otba­sylar, «Altyn alqa» jáne «Kúmis al­qa» ıegerleri  men kóp ba­laly jáne tolyq emes otbasylar 900 myń teńge mól­sherinde turǵyn úı sertıfıkatyna ıe bola alady.

«Budan soń olarǵa tek jet­peı turǵan 10 paıyzdyq mól­sher­di, ıaǵnı 100 myń teń­geni tol­tyrý ǵana qalady», deıdi Aq­tóbe oblystyq energetıka jáne tur­ǵyn úı-kommýnaldyq sharýashylyǵy bas­qarmasynyń basshysy Dastan Amanov. Sodan keıin úmitkerler «Tur­ǵyn úı qury­lys jınaq ban­ki­nen» 19 jyl merzimge nesıe rásimdeı alady eken. Onyń jyldyq ústeme aqysy 2 paıyz­dy  quraıtyn kórinedi. Dál osyndaı qaıtarymsyz tur­ǵyn úı sertıfıkatyna «Nurly jer» memlekettik  turǵyn úı baǵdarlamasyna qatysýshylar da ıe bola alady. Tek otbasynyń ár múshesine shaqqanda taby­synyń kólemi sońǵy 6 aıǵa eseptegende 42 500 teńgeden aspaýy qajet.

Sondaı-aq turǵyndarǵa bas­pana berý úderisinde óńirde turǵyn úı sertıfıkattaryn qaıtarymdy túrde berý tártipteri de qarastyrylǵan. Mundaı áleýmettik qoldaý jaǵ­daıynda beriletin qarjylaı kómek bastapqy jarna somasynyń 50 paıyzyn quraıdy. Ári bul sertıfıkattar otbasynyń ár múshesine eseptegende 42 500 teńgeden asatyn «Nurly jer» baǵdarlamasyna qatysýshylarǵa tıesili. Áleýmettik qoldaýdyń túri 15 jylǵa 1 paıyz­dyq ósim­men beriledi.

Atalǵan turǵyn úı sertıfıkattaryn joǵaryda kórsetilgen sanattaǵy áleýmettik toptar tizimimen shekteı salýǵa bolmaıdy. Sondaı-aq densaýlyq saqtaý, bilim berý, mádenıet jáne sport salalarynda jumys isteıtin bıýdjet qyz­metkerleriniń de oǵan ıe bolýǵa múm­kindikteri bar. Turǵyn úı sertıfıkattaryn berý jergilikti bıýdjet kóz­deri kóleminde júzege asyrylatyn bolǵandyqtan, qazirgi kezde oblysta onyń kiris kózderin tolyqtyrý isi de bir mezgilde qa­tar júrgizilýde. Bıylǵy 2019 jyldyń alǵashqy jarty jyldyǵynda jergilikti bıýd­jettiń kiris­teri kózdelgen me­jeden 106,8 pa­ıyz­ǵa asyra oryndalǵany – osy oı-piki­rimizdiń dáleli. Bul – 55 mıl­lıard 300 mıllıon teńge qosymsha qarajat degen sóz.

Bıýdjet qorjynyn tolyqty­rý­daǵy osyndaı ilkimdi ister «Baqytty otbasy» baǵdarlamasy boıynsha bastapqy jar­nany azaıtý úshin birinshi kezekte 200 mıllıon teńge bólýge múmkindik tý­ǵyzdy. Osy mysaldardyń bári tur­ǵyn­dardy qol­jetimdi baspanamen qamtý isi jergilikti atqarýshy jáne saılanbaly organdardyń udaıy nazarynda turǵanyn kórsetedi.

AQTО́BE