Irgeli bilim ordasy osydan 75 jyl buryn, ıaǵnı 1944 jylǵy 15 tamyzda QazSSR Halyq Komıssarlar Keńesiniń qazaq qyzdarynan joǵary dárejeli mamandar daıarlaý týraly №457 qaýlysy negizinde ınstıtýt bolyp ashyldy.
Sol jyldyń qyrkúıek aıynda ınstıtýtta Fızıka-matematıka, Til-ádebıet jáne Tarıh fakýltetteri ashylyp, 100 stýdent oqýǵa qabyldandy. 1944 jyly ınstıtýttyń úsh fakýltetinde qyzmet etken eń alǵashqy 20 oqytýshynyń beseýi ǵylym kandıdaty, segizi aǵa oqytýshy jáne jeteýi oqytýshy boldy.
Elimizdiń shalǵaı aýdandaryndaǵy qyz balalaryn joǵary bilim alýǵa tartý, olardy rýhanı bıik, parasatty, bilikti mamandar etip tárbıeleý arqyly áleýmettik máselelerdi sheshý maqsatymen ashylǵan bilim uıasynyń bul kezeńi el tarıhynyń eleýli, qıyn da surapyl ekinshi dúnıejúzilik soǵys kezimen tuspa-tus keldi.
Qarashańyraqtyń ashylýyna Qanysh Sátbaev, Muhtar Áýezov, Sábıt Muqanov, Ǵabıt Músirepov, Ilııas Omarov, Jumabaı Shaıahmetov, Nurtas Ońdasynov, Álkeı Marǵulan, Nyǵmet Saýranbaev, Qajym Jumalıev, Ahmet Jubanov syndy ultymyzdyń dańqty perzentteri úlken qoldaý kórsetip, «Táńir jazsa bul ınstıtýt qazirgi jáne bolashaqtaǵy qazaq qyzdarynyń úlken shamshyraǵy bolady. Osy shamshyraqtyń jaryq sáýlesi eshqashan sónbesin» degen aqjoltaı tilegin bildirgen.
75 jyldyq tarıhy bar Qazaq ulttyq qyzdar pedagogıkalyq ýnıversıtetiniń búginde elimizdiń joǵary bilim berý júıesinde ózindik dara orny, aıryqsha bedeli bar. Oqý orny qurylǵan kúninen bastap-aq otandyq bilim berý men ǵylymnyń jarqyn úlgisi, kásibı bilikti ǵylymı jáne pedagogıkalyq mektepterdiń bastaý kózi boldy.
Qyzdar ýnıversıteti ǵasyrǵa jýyq ýaqyt aralyǵynda óziniń qalyptasýy men damýy jolynan ótti. Ult zııalylary qyzmet atqarǵan ulaǵat uıasynda myńdaǵan bilikti maman daıarlanyp, armandaryn asqaqtatyp, qııaǵa qanat qaqty. Aıtýly ǵalymdarymyz túrli ǵylym salalaryna qatysty irgeli zertteý eńbekterin osy ýnıversıtet qabyrǵasynda jazyp, el ıgiligine aınaldyrdy.
Elimizdiń damýyna zor úles qosyp kele jatqan oqý orny búginde Qazaqstannyń joǵary bilikti kadrlar daıarlaıtyn negizgi ortalyǵynyń birine aınalyp otyr. Elimizdegi bilikti mamandar men talantty ǵalymdardyń, daryndy ustazdardyń úlken toby osy kıeli shańyraqtan shyńdalyp shyǵyp, Otanymyzdyń ósip-órkendeýi jolynda jemisti eńbek etip jatyr. Ýnıversıtettiń 75 jyldyq tól tarıhynda oqý ornyn 60 myńnan astam túlek bitirdi.
Qazaqstan Respýblıkasynyń Bilim jáne ǵylym mınıstrliginiń 2008 jylǵy 22 qyrkúıektegi №531 buıryǵy negizinde Qazaq memlekettik qyzdar pedagogıkalyq ınstıtýtyna «Ýnıversıtet» mártebesi berilse, Qazaqstan Respýblıkasynyń Tuńǵysh Prezıdenti Nursultan Nazarbaevtyń 2018 jylǵy 25 jeltoqsandaǵy Jarlyǵymen Qazaq memlekettik qyzdar pedagogıkalyq ýnıversıtetine «Ulttyq» mártebesi berildi. Bul tarıhy tereń ulaǵat uıasynyń álemdik bilim keńistiginde óz ornyn aıqyndaýǵa baǵyttalǵan irgeli qadam boldy. Elbasynyń senimi oqý ornynyń áleýetin kóterip, básekege qabilettigin arttyrýǵa serpin beredi jáne ujymǵa zor jaýapkershilik júkteıdi.
– Nursultan Nazarbaev ýnıversıtetke kelgen saparynda: «Bir qyzdy tárbıeleý – bir ultty tárbıeleýmen birdeı» dep atap ótken bolatyn. Qazaq ulttyq qyzdar pedagogıkalyq ýnıversıtetiniń basty maqsaty – bilikti, joǵary moraldi jáne kásibı qasıetterdi ıelengen tulǵalar daıarlaý. Ordaly oqý ornynyń ujymy búginde osy qundylyqtarǵa súıene otyryp jumys jasaýda, – dep atap ótti Jandar Asan.
