Oblys ákiminiń óńirdegi suranysqa ıe mamandyqtarǵa arnaıy bólgen 100 grantyna jalpy 269 úmitker qujat tapsyrǵan. Olardyń 77-si atalǵan grantqa ıe boldy. Aqtóbe oblysyna qajetti 15 mamandyq boıynsha JOO-da bilim alatyn bolady. Al, qalǵan 23 grant rezıdentýra baǵyty bolǵandyqtan nátıjesi aldaǵy tamyzdyń 25-nen soń anyqtalady. Bilim basqarmasy basshysynyń mindetin atqarýshy Gúlnaz Súleımenova bıylǵy jyly qujat tapsyrǵan úmitkerlerdiń UBT-dan jınaǵan bal kórsetkishteri óte joǵary ekenin aıtady. Sondyqtan da komıssııa múshelerine grantty bólý ońaıǵa soqpady. Máselen, jalpy medısına mamandyǵyna túsýge nıet bildirgen 94 balanyń 68-iń baly 100 den joǵary. Oblys ákiminiń medısına mamandyǵyna bólgen 10 granty 123-124 bal jınaǵan 10 balaǵa buıyrdy. Sonymen qatar, óner, ınformatıka, din mamandyqtaryna talapkerler qujat tapsyrmaǵandyqtan, komıssııa quramy artylǵan granttardy ótinish neǵurlym kóp túsken, ári óńirge qajetti mamandyqtar sanalatyn medısına men bastaýysh jáne pedogogıka mamandyqtaryna bóldi.
«UBT jınaǵan bal kórsetkishteri joǵary, ári bilim alýǵa qushtar balalarǵa qoldaý kórsetilýi qajet. Bilimdi azamattar qashanda qoǵamǵa qajetti, sondyqtan da artylǵan úmitti aqtaıdy degen senimdemin »,-dedi Ońdasyn Orazalın.
Sondaı-aq, memleketten ataýly áleýmettik kómek alýshy, jáne kópbalaly otbasynyń balalaryna arnalǵan QR Ulttyq qorynyń nysanaly transfert esebinen bólingen 180 grantyna 154 bala qujat tapsyrǵan. Qujattary men jınaǵan bal kórsetkishteri boıynsha talapqa saı bolǵan 120 bala osy grantqa ıe boldy. Degenmen komıssııa músheleri qalǵan 34 balanyń ataýly áleýmettik kómek alatyn jáne kóp balaly otbasydan shyqqanyn eskerip, olardyń JOO-da bilim alýyna sheshim qabyldady.
