Jaqynda Qazaqstan Respýblıkasy Prezıdentiniń janynan Ulttyq qoǵamdyq senim keńesi qurylyp, onyń quramy, Erejesi Prezıdent Jarlyǵymen bekitildi. Ulttyq keńestiń quramyna jurtshylyq kókeıindegi ózekti degen máseleler jóninde buqaralyq aqparat quraldarynda ózderiniń oı-pikirlerin batyl aıtyp júrgen azamattardyń engizilgeni qýantady. Táýelsizdiktiń alǵashqy jyldaryndaǵy qym-qýyt qıyn kezeńde ekonomıkalyq reformalar júrgizýge atsalysqan Oraz Jandosov, saıasatkerler Rasýl Jumaly, Seıdahmet Quttyqadam, Aıdos Sarym, Muhtar Taıjan, Marat Shıbutov, Danııar Áshimbaev, Jánibek Qojyq, el ishinde jumys jasap, tájirıbesi mol Qyrymbek Kósherbaev, Erlan Qarın, Raýan Kenjehanuly sııaqty eldiń áleýmettik-ekonomıkalyq jaı-kúıin jaqsy biletin azamattar Ulttyq keńestiń quramynda bolýy jańa qurylymnyń ómirsheń bolatynyna sendiredi. Ulttyq keńestiń quramyn áli de bolsa tolyqtyra túsý qajet sııaqty. Ásirese, memlekettiń bıýdjettik qorjynyn toltyrýǵa qomaqty úles qosyp kele jatqan, sońǵy jyldarda qarsylyq bildirýshi, narazy elektorattardyń kóbirek toptasqan salasy munaıshylardyń belsendi ókilderi engizilse deımiz.
Ulttyq keńestiń erejesinde buryn qabyldanyp, búgingi kúni árekette júrgen memlekettik baǵdarlamalardyń, normatıvtik-quqyqtyq aktilerdiń osal tustaryna saraptama júrgizý, bul oraıda azamattyq qoǵamnyń, saıası partııalardyń, úkimettik emes uıymdardyń arasynda syndarly dıalog ornatý arqyly jurtshylyq pikirin eskere otyryp, sheshimder qabyldaý mindetteri aıqyndalǵan. Ulttyq keńestiń óńirlerde kóshpeli otyrystaryn ótkizip turý da kózdelgen.
Oraıy kelgende birqatar usynystarymyzdy da bildire ketkendi jón sanaımyn.
– О́ńirlerdegi jurtshylyqty tolǵandyryp júrgen ózekti degen máseleler jóninde usynystar jınaqtaý maqsatymen Halyqqa qyzmet kórsetý ortalyqtarynda Ulttyq qoǵamdyq senim keńesiniń arnaıy jáshikterin ornatý qajet.
– Bos jumys oryndaryn jemqorlyqtyń kózine, tamyr-tanystyqqa, saýdaǵa aınaldyryp júrgenderdiń jolyn kesýdiń naqty joldaryn qarastyrý kerek.
– Sheteldik kompanııalarda jergilikti jumyskerlerdiń azamattyq quqyǵynyń taptalmaýyn kózdeıtin zańdardy qabyldatýǵa kúsh salý qajet.
– Bilim salasyndaǵy biliksiz reformalarǵa tyıym salyp, bastaýysh synyptarda sabaq tek ana tilimizde júrgizilýin júıege túsirý kerek.
– Otandyq ónimderdiń órisin keńeıtý, jergilikti shıkizatty óńdeıtin kásiporyndarǵa salyqtyq, basqa da jeńildiktermen qoldaý kórsetý, jańa týǵan sábılerge mindetti túrde depozıttik esep kartalaryn ashý, oǵan memlekettik qordan nemese ata-anasynyń jumys ornynan aı saıyn 10 myń teńge kóleminde qarjy aýdaryp turý sııaqty jurtshylyq kókeıinde júrgen basqa da máselelerdi Ulttyq keńes otyrystarynda júıeli túrde talqylap, tıisti sheshimder qabyldansa deımiz.
Qoryta aıtqanda, Ulttyq keńesten kúterimiz kóp, qalyń kópshiliktiń kókeıindegi naqty usynystar eskerilip, utymdy sheshimder qabyldanyp, naqty iske asyrylyp jatsa, utarymyz da kóp bolmaq degen senimdemiz.
Esbergen IŃIRBAIULY,
Aqtaý qalalyq qoǵamdyq keńesiniń tóraǵasy
Mańǵystaý oblysy
