Osylaısha, «Samuryq-Energoǵa» nesıelik portfelindegi valıýtalyq qaryzdarynyń úlesin 17%-dan 3%-ǵa deıin azaıtyp, holdıngtiń qarjylyq kórsetkishterine valıýta kýrsy qubylýynyń teris áserin azaıtýǵa múmkindik týdy. Valıýtalyq qaryzdy merziminen buryn óteý ekonomıkany dollarsyzdandyrýǵa, syrtqy kvazımemlekettik qaryzdyń deńgeıin azaıtýǵa jáne ulttyq kompanııalar aktıvteriniń qunyn ulǵaıtýǵa yqpal etti.
«Sonymen qatar «Samuryq-Qazyna» AQ-nyń 50 mln AQSh dollary kólemindegi korporatıvtik kepildiginiń kúshin joıýǵa, sol arqyly aksıonerdiń shartty túrdegi mindettemeleriniń somasyn tómendetýge múmkindik berdi», dedi «Samuryq-Energo» AQ Qazynashylyq jáne korporatıvtik qarjy departamentiniń dırektory Sergeı Lı. Onyń aıtýynsha, otandyq qor naryǵynyń damýyn qoldaý maqsatynda valıýtalyq qaryzdy óteýge kerekti qarajat AHQO halyqaralyq qor bırjasynyń alańyna tartylǵan.
Esterińizge sala keteıik, qýaty 300 MVt bolatyn, O.Qantaev atyndaǵy Moınaq SES-i 2012 jyly paıdalanýǵa berilgen-di. Ol Almaty oblysy Raıymbek aýdanyndaǵy Sharyn ózeninde ornalasqan. Joba Almaty, Jambyl, Qyzylorda jáne Túrkistan oblystarynda elektr energııasynyń tapshylyǵyn azaıtýǵa úles qosyp keledi. Stansa qurylysyn Qytaıdyń Memlekettik damý banki men Qazaqstannyń damý banki birlesip qarjylandyrǵan edi.
«Stansanyń jabdyǵy paıdalanýǵa berilgenine 7 jyl ótti. Joba sátti iske asyryldy dep senimmen aıta alamyz. Qytaıdyń Memlekettik damý banki «Samuryq-Energo» tobynyń qaryzdy qaıta qarjylandyrý jónindegi bastamasyna tolyq qoldaý bildirdi. Biz «Samuryq-Energo» AQ-yn Qazaqstandaǵy senimdi seriktesterimizdiń biri dep bilemiz jáne yntymaqtastyǵymyz odan ári jalǵasady dep úmittenemiz», dedi baspasóz konferensııasynda Qytaıdyń Memlekettik damý bankiniń Qazaqstandaǵy ókildiginiń Naryqty zertteý jáne bıznesti damytý departamentiniń bas menedjeri Fan Sıaohýeı.
2016 jyldan bastap «Samuryq-Energo» AQ kredıttik portfelindegi valıýtalyq qaryzdarynyń úlesin belsendi túrde azaıtyp keledi. 2017-2018 jyldary toptyń nesıe portfelindegi shetel valıýtasymen alynǵan qaryzy 65%-dan 17%-ǵa deıin azaıtyldy.
Búgingi tańda «Samuryq-Energo» AQ stansasynyń ekinshi kredıtory – «Qazaqstannyń damý banki» AQ-men yntymaqtastyǵyn jalǵastyryp keledi. Valıýtalyq qubylýǵa ushyraýyn odan ári tómendetý maqsatynda qaryzdyń bir bóligin AQSh dollarynan teńgege konvertasııalaý jónindegi kelisimge qol jetkizildi. Mámile aıaqtalýynyń qorytyndysy boıynsha, valıýtalyq mindettemelerdiń úlesi 3%-dan 1,6%-ǵa tómendeıdi, sondaı-aq qamtamasyz etý bazasynan Moınaq sý elektr stansasynyń negizgi aktıvteri bosatylady.
