Infraqurylym júıeleri tolyq tartylmaı jatyp, paıdalanýǵa berilgen kópqabatty úı turǵyndarynyń jergilikti bılikke ókpesi qara qazandaı.
«Úshinshi megapolıs dep maqtanyp jatamyz. Al qalanyń jańa shaǵyn aýdanynda áli jóni túzý asfalt jol joq. Ákimdiktegiler shahardyń ortalyq birneshe kóshesin bezendirýden ary asa almady», dep kúıinedi turandyqtar.
Anyǵynda, naýryz aıynda Prezıdent tapsyrmasyna oraı Premer-Mıınstr Asqar Mamın bastaǵan Úkimet músheleri osy shaǵyn aýdannyń ınjenerlik ınfraqurylym jobasymen tanysqan bolatyn. Sol kezde áp-ádemi taqtaıdaı túzý jol qaǵazǵa túsirilgenimen, qara jerge áli tósele qoımady.
Úkimet basshysynyń aldynda Turannyń tańǵajaıyp bolashaǵy týraly baıandaǵan eks-ákim Ǵabıdolla Ábdirahymov shaǵyn aýdanda jalpy uzyndyǵy 33,7 shaqyrym bolatyn 13 magıstraldy avtojoldyń qurylysy qaralyp, 13 jumys jobasy jasaldy degen bolatyn. Negizgi magıstral Báıdibek bı dańǵylynan 2-3 shaqyrym jerde «Adııa» jáne «Otaý Stroı» turǵyn úı keshenderi ornalasqanyn eskere otyryp, alǵashqy kezeńde jalpy uzyndyǵy 7,8 shaqyrym bolatyn №1, 2 jáne 7 kóshelerdiń, 21 myń sharshy metr jaıaý júrginshiler joly men 23 myń sharshy metr velojoldyń qurylysyn bastaý týraly sheshim qabyldanǵan.
Ekinshi kezeńde jalpy uzyndyǵy 16,7 shaqyrym bolatyn, jaıaý júrginshiler jáne velojoldary bar 5 kósheniń (№3, 4, 5, 6 jáne 10) qurylysy josparlanýda. Jobany júzege asyrý úshin «О́ńirlerdi damytý – 2020» baǵdarlamasy boıynsha, Ulttyq ekonomıka mınıstrligine 5,4 mlrd teńge kóleminde qarjy bólý úshin bıýdjettik suranystar jiberilgen.
Úshinshi kezeńde jalpy uzyndyǵy 9,1 shaqyrym bolatyn qalǵan 5 kósheniń (№8, 9, 11, 12 jáne 13) qurylysy qaralǵan. Jobanyń quny – 1,9 mlrd teńge. Buǵan qosa jalpy quny 10,4 mlrd teńge somaǵa sýmen jabdyqtaý, sý ótkizý, elektr jáne gazben jabdyqtaý jelilerin tartý qajet bolǵan.
Alaıda osy jobanyń kóbiniń qurylysy áli turalap tur. Shilde aıynda sol kezdegi qalanyń eks-ákimi Ǵabıdolla Ábdirahymov Turan shaǵyn aýdanyndaǵy №1, №2 jáne №7 jańa kólik joldarynyń qurylysymen tanysqan-tuǵyn.
О́kinishke qaraı kezinde beı-bereket satylǵan jer telimderiniń saldarynan jol bóligi túsetin jerlerge turǵyndar úı turǵyzyp alǵan. Osyny eskergen qala basshysy №1 kóshesindegi joba boıynsha jolǵa túsetin jer telimderin alý máselesinde turǵyndarmen aqyldasa kele, jobaǵa ózgeris engizip, buzylýy tıis 14 úıge tıispeıtin bolǵan. Nátıjesinde úılerdi aınala jol salý týraly sheshim qabyldaǵan. Ári osy joldardy bıyl qarasha aıynda aıaqtap, 1 qazanǵa deıin úsh joldy túıistirip, ishki joldarmen qoǵamdyq kólik júretin bolady, dep sendirgen edi.
Mine, naýryzda halyqqa úıip-tógip ýáde etilgen ýaqyttyń da sanaýly merzimi qaldy. Ázirge shaǵyn aýdan turǵyndary aldaǵy kúnderden úmitin úzbeı shańdaq jolmen qatynap júr.
ShYMKENT
