«El úmiti» jáne «Qamqorlyq» jobalary daryndy jastardy qoldaýǵa baǵyttalady

Elbasy akademııasy qurylady

Osy oraıda atalǵan qordyń atqarýshy dırektory Áset Isekeshev «El úmiti» bastamasynyń mıssııasy – elimizdiń daryndy balalary men jastaryn, sonyń ishinde shetelde turatyn jastardy izdep-taýyp, qoldaýǵa septesý ekenin aıtady. «Biz bul bastamanyń aıasynda elimizdiń jastaryn barynsha qamtýǵa tyrysamyz, olardyń ereksheligin, darynyn, ǵylymı jáne kóshbasshylyq áleýetin eskere otyryp, ár balaǵa ózin ózi damytýyna teń múmkindik beremiz», dedi Á.Isekeshev.

Qordyń baspasóz qyzmeti taratqan aqparatqa sáıkes, «El úmiti» bastamasy aıasynda Tuńǵysh Prezıdent qory Úki­met­pen, oblys ákimdikterimen, qoǵamdyq birlestikterimen, bilim berý jeke uıym­da­rymen, bıznes qaýymdastyǵymen jáne qyzy­ǵýshylyq bildirgen taraptarmen birl­esip jumys istemek. Seriktestermen birge júzege asyrylatyn jobalar qata­rynda daryndardy anyqtaý jáne qol­daý ortalyqtaryn qurý, jastar úshin kóshbasshylyq jáne tulǵalyq ósý baǵdarlamasyn jasaý jáne júzege asyrý, Olımpıada jeńimpazdary men olardyń pedagogtaryn qoldaý baǵdarlamasy, talanttar men kóshbasshylardy qosatyn birikken qaýymdastyq qurý, «IQanat» qo­ry­men birge aýyl balalaryna arnalǵan «Myń bala» zııatkerlik damý baǵ­dar­la­ma­syn júzege asyrýǵa kómek kór­setý kózdelip otyr.

Jas talanttar men ár saladaǵy kósh­bas­­shylardyń (patrıotızm, sporttyq jetis­tikter, eriktilik, akademııalyq je­tistikter) jan-jaqty damýy úshin ju­mys­ty kúsheıtý maqsatynda jeke ósý baǵdarlamasyna belsendi qatysqandar úshin marapattaý baǵdarlamasy jasalady. Osy mindetterdiń iske asyrylýyn úılestirý úshin qordyń janynda «Elbasy akademııasy» qurylady. Bul «El úmiti» bastamasyn iske asyrýdy basqarý jónindegi operator retinde áreket etedi. «El úmiti» bastamasynyń aıasynda ádistemeler, taǵylymdamalar baǵdarlamalary men granttar ázirlenedi. Bul ár óńirde jyl saıyn aýyldar men shaǵyn qalalardan keminde 3 myń daryndy balany anyqtap, keıingi bilim berýde qoldaý kórsetetin talanttardy anyqtaý jáne qoldaý ortalyqtaryn (17 ortalyq) qurýǵa múmkindik beredi.

Birinshi kezeńde, eki jyl aralyǵynda ǵylym, ekonomıka, mádenıet, sport jáne qoǵamnyń basqa da baǵyttarynyń mem­le­ket­tik basqarý salalarynda 500-den kem emes kóshbasshy pýlyn qalyptastyrý jos­parda bar. Daryndy jastar, kóshbasshylar men oqytýshylarynyń Biryńǵaı qoǵamdastyǵy qurylady. Bastamany ýaqtyly jáne sapaly iske asyrý úshin Tuńǵysh Prezıdent qory múddeli memlekettik organdarmen birlesip «Jol kartasynyń» jobasyn daıyndady. Sonymen qatar Tuńǵysh Prezıdent qory bilim berý jáne jeke tulǵany damytý boıynsha jeke qorlardyń bastamalaryna qoldaý kórsetedi.

Erekshe qajettilikteri bar balalarǵa qoldaý kórsetpek

Sondaı-aq Elbasynyń qory erekshe qajettilikteri bar balalardy qoldaýǵa baǵyttalǵan «Qamqorlyq» jańa bastamasyn iske asyrý boıynsha da jumysyn bastady. Búginde Qazaqstanda shama­men 86 myń múmkindigi shekteýli bala jáne erekshe qajettilikteri bar 156 myń bala bar. Júrgizilgen taldaýlar boıynsha, balalardyń kóbi ońaltýdy únemi qajet etedi. Bul – júıke júıesi, tirek-qımyl júıesi jáne basqa da aýyr dertteri bar balalar. Osy maqsatta Tuńǵysh Prezıdent qory memlekettik, kom­mersııalyq jáne qoǵamdyq ınstı­týt­tardyń kúsh-jigerin biriktire kele, damýynda aýytqýy bar bala­lar­dyń ómir súrý jaǵdaıyn jaqsartý maq­satynda, naqty aıtqanda, atalǵan sanattaǵy balalardy qoldaý júıesin jańǵyrtý bo­ıynsha jumys júrgizýde.

Tuńǵysh Prezıdent qorynyń atqa­rý­shy dırektory Á.Isekeshev bul bas­tamany iske asyrýdyń negizgi tetik­te­ri týraly bylaı deıdi: «Tuńǵysh Prezıdent qory osy bastama aıasynda múge­dektikti azaıtý, áleýmettendirý, aldyn alý jáne erekshe qajettilikteri bar bala­larǵa jaǵdaı jasaý úshin birinshi kezekte qoldanystaǵy ınfraqurylym negizinde segiz ońaltý ortalyǵyn ashýǵa kómektesedi. Sonymen qatar biz bilim berý uıymdarynda segiz ınklıýzııany qoldaý resýrstyq kabınetterin ashýǵa kómektesýdi josparlap otyrmyz. Mundaı ortalyqtar ásirese Nur-Sultan, Taraz, Túrkistan, Semeı, Qostanaı, Oral, Atyraý jáne Taldyqorǵan qalalaryna qajet. Elbasynyń tapsyrmasyna sáıkes, ortalyqtardy qajetti jabdyqtarmen «Samuryq-Qazyna» UÁQ» AQ qamtamasyz etedi».

Tuńǵysh Prezıdent qory mamandar daıarlaý jáne shoǵyrlandyrylǵan elektron­dy platforma qurýǵa jár­dem­despek. Joǵaryda atalǵan is-shara­lar – «Qamqorlyq» bastamasynyń birinshi kezeńi. Bul jyl saıyn erekshe qajet­ti­lik­teri bar 5 myńǵa jýyq balaǵa qajetti kómek kórsetýge múmkindik beredi. Bul rette aldaǵy ýaqytta yqpaldastyrylǵan kómek júıesi qurylatyn bolady.