Aımaqtar • 16 Tamyz, 2019

Aýyl mektebiniń ata-analary nege alańdaýly?

274 retkórsetildi

«Egemen Qazaqstan» gazetiniń menshikti tilshiler qosynyna Eńbekshiqazaq aýdany, Qazaqstan aýyldyq okrýgine qarasty J.Qaıypov atyndaǵy orta mekteptiń ata-analar komıtetiniń ókilderi habarlasyp, oqý ornyndaǵy bilim men tárbıe jumysyna qatysty alańdaýshylyǵyn bildirgen edi.

Ata-analar aýyldaǵy bilim uıa­syn­da ustaz atyna kir kel­ti­rip júr­gen muǵalimderdiń ju­mys isteı­ti­nin, olarǵa tıisti shara qol­­danýdy surap joǵaryǵa jaz­ǵan aryzdaryna tushymdy jaýap beril­me­gen­dik­ten baspasózge shaǵym­da­nýǵa májbúr bolǵandaryn aıtady. Oqıǵa ótken oqý jylynda bolǵan eken. 8 naýryz merekesi qarsańynda osy mekteptiń joǵa­ry synyp oqýshylary sabaq bólmesindegi dastarqannan túsirip, jarııalaǵan sýret áleýmettik jeli­ler­de qyzý talqyǵa tústi. Al sýret­te dastarqanǵa qoıylǵan tátti sýsyndarmen qatar ishimdik bótelkesi turǵan bolatyn. Áýel­gide bala­la­rynyń mektepte araq ishýinen kúdik­ten­gen ata-analar olardy qyspaqqa alady. Ashyq áńgimeden keıin oqý­shylar sol kúni dastarqanda tur­ǵan bótelke muǵalimderge arnap alynǵanyn moıyndaǵan. Ata-ana­lar­dyń talabynan keıin joǵary synyptyń bir top oqýshysy ózderin mektep ustazdarynyń ishimdik satyp ákelýge májbúrleıtinin, sondaı-aq muǵalimderdiń sabaqtan keıin kabınetke jınalyp alyp araq ishetin­derin aıtady. Ata-analar komı­te­ti osy oqıǵadan keıin dabyl qaǵyp, aýdan ákimi men bilim bólimi bas­shy­sy­nyń atyna shaǵym jazypty. Izin ala mekteptegi jaǵdaıdy tekserýge arnaıy komıssııa kelip, mektep dı­rektory Sharafat Orynbaevaǵa jibe­rilgen kemshilikteri úshin sógis jarııa­lap ketken.

– Biz, J.Qaıypov atyndaǵy or­ta mektep­tiń bir top ata-ana­­sy, mek­­­tep dırektorynyń oqý-tár­bıe isi jónindegi orynba­sary J.Málibe­kova, qa­zaq tili men ádebıeti páni mu­ǵa­­­limi D.Orynbaeva jáne tarıh-geografııa páni muǵalimi G.Abýbakırovalardyń ústinen 5 mamyr kúni aýdandyq bilim bóli­mi­niń basshysy B.Amanovaǵa jáne aýdan ákimi B.Ysqaqqa shaǵym-aryz jazǵan bolatynbyz. Sebebi J.Málibekova bastaǵan top mektep qabyrǵasynda óreskel qylyq jasap, ishimdik ishken jáne balalardy spırttik ishimdik ákelýge májbúrlegen. Bul oqýshylarmen áńgime kezinde anyqtalyp, olardyń sózderi aýdıojazbaǵa jazylǵan. Shaǵym boıynsha aýdannan kelgen tekserýshiler muǵalimder men oqýshylarǵa birer suraq qoıyp, qaıtyp ketti. Artynan mektep dırektoryna sógis jarııalapty dep estidik. Al shýdyń shyǵýyna sebepker bolǵan dırektordyń oqý-tárbıe isi jónindegi orynbasary J.Málibekovany jumystan bosa­typ­ty. Bir qyzyǵy, qyzmettik min­de­tin durys atqarmaǵany úshin ju­mys­tan bosatylǵan dırektordyń oqý-tárbıe isi jónindegi orynbasary J.Málibekova arada bir apta ótpeı jatyp mekteptiń psıholog mamany retinde jumysqa qaıta qabyldanypty. Oqý jylynyń sońy jaqyn qalǵandyqtan, bul isti indetip otyrýǵa ata-analardyń ýaqyty bol­ma­dy. Aldymyzda ul-qyzymyz úshin jaýapty kezeń – UBT turdy. О́kinishke qaraı, bıyl mekteptegi oqý kórsetkishi kútkendegiden tómen boldy. Bul endi ustazdardyń da, ata-analardyń da atyna úlken syn ekenin moıyndaýymyz kerek. Onyń bir ushyn mekteptegi bilim men tárbıeden izdep, ustazdar qaýymyna syn kózben qaraǵanymyz ádiletti dep oılaımyn, – deıdi Qazaqstan aýy­lynyń turǵyny, ata-analar komı­tetiniń tóraıymy Elmıra Tasbaeva.

Biz bul másele boıynsha Eńbek­shi­qazaq aýdandyq bilim bólimi­niń basshysy Bátes Amanovaǵa habarlasyp, pikirin bildik. Aýdannyń bas ustazynyń aıtýynsha, jumysyna salǵyrt qaraǵan mektep dırektoryna sógis jarııalanyp, al sózge ilingen orynbasar jumystan bosatylǵan.

– J.Qaıypov atyndaǵy mektep­te­gi oqıǵamen jiti tanyspyn. Ko­mıs­­sııa baryp jaǵdaıdy bildi. Mek­tep dırektoryna sógis berdik. Kiná­li muǵalimderdi jazalaýdy tap­syryp, usynyshat jiberildi. Biraq ata-analardyń shaǵymynda aıtyl­ǵandaı, mektepte ishimdik ishý deregi dáleldenbedi. Naqty dálel­siz muǵalimderdi qaralap, shara qoldana almaımyz. Ata-analarǵa bul jaǵ­daı­ǵa oraı quqyq qorǵaý oryndaryna sha­ǵymdanyp, isti teksertýge quqyly eken­­dikteri eskertilgen, – deıdi aýdan­­­dyq bilim bóliminiń basshysy Bátes Amanova.

Biraq aýyl turǵyndary bilim bóli­mi basshysynyń ýájine toqta­ǵa­nymen, mektep dırektory tarapynan taǵy da keleńsiz áreketter jasaý jalǵasyp jatqanyn aıtyp otyr.

– О́tken oqý jylynda ınforma­tı­ka páni muǵalimi T.Babaeva men aǵylshyn páni muǵalimi M.Qasym­be­kovanyń qyzmettik mindet­terine salǵyrt qarap, josparly sabaq­taryn tolyq ótpegendikten, oqýshylar bilimi tómendep ketkeni anyqtalǵan edi. Osy jaǵdaıǵa baılanysty mektep dırektorynyń buıryǵymen ol ekeýi jumystan shyǵarylǵan bolatyn. Biraq uıymdasqan toptyń arqasynda aýdanǵa aryz domalatyp júrip M.Qasymbekova men T.Babaevanyń jumystan shyǵarylǵany týraly buıryq bola tura qaıta jumysqa qabyldanǵan. Osyndaı óz jumysyna jaýapkershilikpen qaramaıtyn muǵalimder bilim mekemesinde qalaı jumys isteıdi? Sonda qyzmetten qýylǵan muǵa­limder bıyl túk bolmaǵandaı taǵy da sabaq berýdi jalǵastyra bermek pe?, – deıdi ata-analar komıtetiniń tóraıymy Elmıra Tasbaeva.

Al ata-analar komıtetiniń mú­she­si Nurgúl Áýkenova aýyl mek­te­­­bindegi jaǵdaıdyń tym shıele­ni­sip turǵanyn, pedagogıkalyq ujymnyń top-topqa bólinip alyp joǵaryǵa jıi aryz jazatynyn, tekserýshilerdiń jıi keletinin jáne sonyń kesirinen oqý úlgeriminiń tómendep otyrǵanyn aıtady.

– Alaqandaı aýyldaǵy mektep­tiń jaman aty shyqqanyn bári­miz qala­maı­myz. Biraq bala­la­rymyzdyń bolashaǵy úshin únsiz otyra ber­meı­tin shyǵarmyz. Onsyz da bizdiń mektep muǵalimderi aryz jazýǵa júırik bolyp tur. Tipti Eńbekshiqazaq aýdany boıynsha ishki tekserý jıi bolatyn bilim uıasynyń biri osy J.Qaıypov atyndaǵy orta mek­tep eken. Ásirese mekteptegi baıyrǵy muǵalimder tarapynan ju­mys­qa endi turǵan jas mamandarǵa shetqaq­paı­lyq jasalady eken. Muny aýdan­nan kelgen komıssııa músheleri aıtty. Al endi osyndaı jerde bilim sapasy bola ma? Kóktemdegi jaǵ­daı boıynsha, muǵalimderdiń mektep­te ishimdik ishýi dáleldenbedi deıdi. Biraq oqıǵanyń bolǵany ras, oqýshylardy «ashy sýǵa» jumsaǵan jaǵdaı anyq bolǵan. Muny dáleldeý úshin endi mektep muǵalimderinen maskúnemdikke qarsy testileýden ótýin talap etýdemiz, – deıdi aýyl turǵyny Nurgúl Áýkenova.

Jalpy alańdaýly ata-analar óz shaǵymyn Almaty obly­synyń ákimi Amandyq Bata­lov­qa da joldaǵan eken. Olar óńir basshysynyń aralasýymen mektep­te­gi jaǵdaı ońalyp, jańa oqý jylynda balalardyń sapaly bilim alýyna kepildik beriletinine senimdi.

 

Almaty oblysy

 

Sońǵy jańalyqtar

Ystyq tamaq taratty

Qazaqstan • Búgin, 17:59

Jaqsy ákim jalǵyz júredi

Tanym • Búgin, 17:02

Betperde kıgen kóktem

Tanym • Búgin, 16:55

Uqsas jańalyqtar