«Bıyl 2700 gektarga alqapqa dál eginshilik tehnologııasyn engizdik. Bıdaımen qatar kúnbaǵys, soıa, arpa, júgeri synaqtan ótedi. Qytaılyq jáne amerıkalyq tájirıbelerdi qoldaný arqyly teriskeıdiń klımaty men topyraǵyna tózimdi aýyl sharýashylyq daqyldary suryptaryn aýdandastyrmaqpyz», dedi óz sózinde A. Kúrishbaev.
Shynynda da, jelmen terbelip, jaıqala ósip turǵan el rızyǵy tyń tehnologııalar men zamanaýı qondyrǵylardyń kómegimen ósirilgen. Mamandardyń boljamynsha gektapr berekeligi 30 sentnerden kem bolmaıtyn túri bar.
S.Seıfýllın atyndaǵy QazATÝ jer resýrstaryn basqarý, sáýlet jáne dızaın fakýltetiniń dekany Farabı Ermekovtyń aıtýynsha, áýege kóterilgen dron-dál eginshiliktiń birden-bir taptyrmas quraly. Ol arqyly jerdiń naqty kartasy jasalyp, nendeı daqyl egiletini, qaı ýchaskede aramshóp shyqqany, bylaısha aıtqanda, mol ári sapaly ónim alýdyń barlyq aqparattary dálme-dál jınaqtalady. Drondar men alystan basqarylatyn ushaqtarda qarapaıym optıkalyq kamera, mýltıspektraldyq kamera, teplovızor men lazerlik skaner ornatylǵan. Osynyń arqasynda jerdiń 3D modelin jasaýǵa bolady.Taǵy bir kómekshi – meteostansııalar. Olar topyraqtaǵy ylǵal mólsheri men temperatýrany anyqtaıdy. Jaýyn-shashyn, aýa raıy ózgeristerin boljaıdy.
«Buryn agronomdar egistik naýqanyn bastaý ýaqytyn jerdi qolmen ustap biletin. Biraq, bul – keńestik kezeńnen qalǵan eski ádis. Qazir–avtomatıka ǵasyry. Dıqandar osyndaı ozyq qondyrǵylardy tıimdi paıdalana bilse, jańasha eńbek ete alady», dedi jıynda Qumar Irgebaıuly.
Jıynda aramshópti qurtatyn gerbısıdti shamadan tys qoldaný daqyl úshin de, adam aǵzasy úshin de óte qaýipti ekeni aıtyldy. О́kinishke oraı, ony sharýalardyń deni eskere bermeıdi. Ýly tyńaıtqyshty barlyq alqapqa tóge salatyn jaıttar kezdesedi. Teriskeıdiń topyraǵy óte qunarly ekenine qaramastan keı sharýashylyqtar onyń áleýetin tıimdi paıdalanyp júrgen joq. Ortasha ónimdilikti 15-16 sentnerden asyra almaı júr. Suryp qansha sapaly bolsa da qunarsyz jerge egilse, eshqashan mol ónim bermeıdi. Osy sebepti jerdi tyńaıta, qunarlandyra bilýdiń mańyzy zor.
Búginde 120 jergilikti agroqurylym sıfrlyq tehnologııa boıynsha jumys isteıdi. Kelesi jyldan bastap birneshe aýdandarda sıfrlandyrý elementteri engiziledi.
Soltústik Qazaqstan oblysy
