Qazaqstan • 19 Tamyz, 2019

Tamyz keńesine qatysýshylardyń lebizi

416 retkórsetildi

Abzal SAPAROV,

Aýdandyq bilim
bóliminiń basshysy:

– Bıylǵy Tamyz keńesi bizge biraz jyldyq jospar qurýǵa negiz boldy. Bilim berý salasyndaǵy qordalanǵan máselelerdi júıeli sheshýdiń joldary kórsetilip, Memleket basshysy Qasym-Jomart Toqaev atalǵan túıtkilderdiń túıinin tarqatatyn tapsyrmalar berdi. Sonyń ishinde pedagog kadrlarynyń quramy men kásibıligi, bilim sapasyn kóterý úshin keshendi sharalar retinde muǵalimderdiń biliktiligine qatysty aıtylǵan Prezıdenttiń tapsyrmasy óte oryndy boldy. Al «Pedagog mártebesi» týraly zańnyń qoldanysqa engizilý merzimi bekitildi. Bul – biz asyǵa kútken qujat.

Budan bólek, bilim berý júıesin sıfrlandyrý,  zamanaýı ǵylym jáne ony damytý joldary tóńireginde mınıstrlik birqatar mindetti aıqyndady. Atalǵan máseleler – kezek kúttirmes sheshimdi qajet etetin ózekti taqyryptar. Al men úshin eń eleýlisi – qosymsha bilim berý týraly josparlanǵan is-sharalar. Bala ómiri úshin onyń mańyzy óte joǵary.

 

Batys Qazaqstan oblysy,

Shyńǵyrlaý aýdany

 

Kenje SERIKBAI,

Turar Jalǵasbaıuly atyndaǵy
«Shaıyr» orta mektebiniń dırektory:

– HHI ǵasyr ǵylym men tehnıkanyń qa­rysh­tap damyǵan zamany ǵana emes, ózgeris­ter kezeńi bolyp tur. Soǵan saı balalar­dy qalyptastyrý jolynda bilim berý sa­lasynyń udaıy ózgerip otyrýy – zańdylyq. Bıylǵy Tamyz konferensııasynan balalardy tárbıeleý, bilim berý, oqytý júıesinde birqatar eleýli ózgeris kútip turǵanyn túsindim.

Bıylǵy Tamyz keńesi Memleket basshysynyń arnaıy kelip qatysýymen erekshelendi. Bul – salmaǵy aýyr salanyń júgin kóterý memlekettiń mańyzdy múddesi, eń negizgi saıasattyń basym baǵytyna aınalǵanynyń aıǵaǵy. Al kóńilge jylylyq uıalatqany – Qasym-Jomart Kemeluly áýeli bilim men ǵylymdaǵy maıtalman mamandardyń, sondaı-aq osy salaǵa qatysty qoǵamdyq qyzmetker men ata-analar atynan kelgen ókildiń oı-pikirin tyńdap, soǵan saı Úkimet pen oblys basshylaryna shara qabyldaýdy shegelep tapsyrýy.

Konferensııada aıtylǵan muǵalimderdi 5 kúndik jumys júıe­sine kóshirý týraly usynysty qoldaımyn. 

 

Mańǵystaý oblysy,

Mańǵystaý aýdany

 

Janargúl QASYMHANQYZY,

Ekpindi aýylyndaǵy M.Áýbákirov atyndaǵy orta mekteptiń matematıka pániniń muǵalimi:

– Alqaly jıynda elimizdegi bilim berý má­selesine qatysty aýqymdy máseleler qaral­dy. Onyń ishinde mektep muǵalimderiniń kó­keı­inde júrgen, áli de bolsa sheshimi tabyl­maǵan jaıttar sóz bolyp, aldaǵy ýa­qytta kóptegen olqylyqtardyń orny tola­ty­­nyna senim uıalady. Ásirese Prezıdenttiń el Úkimetine tórt jyl­dyń ishinde muǵalimderdiń jalaqysyn eki esege ósirýdi tap­syr­­ǵa­ny ustazdar qaýymynyń eńbegin elep, qıyndyǵy men qyzyǵy qatar júretin salaǵa jas mamandardy yntalandyrdy desem artyq emes.

Sonymen qatar synyp jetekshiligi men dápter teksergeni úshin qo­symsha aqyny eki esege ósirý, eńbek demalysynyń merzimin 56 kúnge deıin uzartý, magıstr dárejesi úshin ústemeaqy tóleý já­ne taǵy basqa sharalar kózdelip otyr. 

Ustaz eńbegi qyzyqty da, qýanyshty bolǵanymen, óz aýyrt­palyqtary bar. Sondyqtan muǵalimniń zeınetke shyǵý jasyn qaıta qarap, bir júıege keltirý oryndy dep oılaımyn.

 

Almaty oblysy,

Alakól aýdany

 

Ulbıke О́mirbekqyzy,

«Syr juldyzy» balabaqshasynyń tárbıeshisi:

– Bıylǵy Tamyz keńesinde ǵylymdy aı­ryq­sha atap ótý – tyń ózgeristerge baǵyt al­­­ǵan­­­nyń belgisi. Iаǵnı, balany oqytyp, bilim berip qana qoımaı, olardy ǵylymǵa tár­­­bıe­­leýdi, qyzyǵý­shy­­lyǵyn arttyrýdy bala­baq­shadan bastaý dep túsindim. Ǵylym adam ómir­inde, kóbimiz oılaı­tyndaı, doktorantýraǵa túskende emes, bala kúnnen bastalady. Aı­nala qorshaǵan ortanyń, kúndelikti tirshilik pen qarapaıym sý­dyń kúıin ózgertýi – bala úshin kádimgi ǵylym. Mektep, ýnıversıtette belgili bir deńgeıde kúrdelene túsetini bolmasa, álemdi túsiný, onyń qupııasyn ashý, ǵylymǵa qadam basý balabaqshadan, demek bizden bastalady. Osy oraıda, aldaǵy oqý jylynda bala­lardy qyzyqtyratyn tájirıbeler jasaýdy jańasha túrde jalǵastyrmaqpyn.

Mektepke deıingi bilim salasynda 7 jyldan asa jumys istep kelemin. Tárbıeshi mamandyǵynyń bedeli elimizde eń tómengi satyda ekenine kózim jetti. Nelikten degen suraq kóp tolǵandyrdy. Aldaǵy qańtardan bastap kúshine enetin «Pedagog mártebesi týraly» zań osy bir alańdaýshylyq oıyma núkte qoıady dep senemin.

 

Qyzylorda

 

Meıirjan TEMIRBEK,

Aqmektep orta mektebiniń
ınformatıka pániniń muǵalimi:

– Memleket basshysynyń ózi pedagogtardy kásibı qyzmetine jatpaıtyn, jónsiz ju­mystarǵa jegýdi joıatyn, núkte qoıatyn tapsyrmany oblys ákimderine berdi. Onyń oń nátıjesin aldaǵy ýaqytta kútemiz.

Al úshtildilikke qatysty oıǵa kelsem, Qasym-Jomart  Kemel­uly óte oryndy aıtty. Keıbir pánderdi aǵylshyn tilinde oqytýǵa kóshi­rýde mekteptiń, muǵalimniń daıyndyǵy, oqýshylardyń qalaýy eskerilýi tıis. Sebebi barlyq bilim oshaqtary men pedagogtar oǵan daıyn emes. Pán muǵalimderi túgili, aǵylshyn tilin 4 jyl oqyp kelgen mamandardyń ózine bıologııa men hımııanyń termınderi ońaı tımeıdi, sondyqtan oǵan birtindep kóshken jón. Elbasy aıtqandaı, qazaq tili birinshi bolýy kerek. Memlekettik til ǵylym tiline aınalýy qajet.

Oblystaǵy talqylaýlarda áriptester bolyp jetkizgen usyny­sy­myzdyń ishindegi 5 kúndik jumys júıesine kóshý engiziletin boldy. Soǵan qýanyshtymyz. Alaıda bir usynysymyz qoldaý tappaı qaldy. Bul – muǵalimderdiń zeınet jasyn shegerý máselesi.

 

Shyǵys Qazaqstan oblysy,

Tarbaǵataı aýdany

 

Aısulý SAPARQYZY,

oqýshynyń ata-anasy:

– Dástúrli Tamyz keńesiniń bıylǵy oty­ry­synda Prezıdent Qasym-Jomart Toqaev­­tyń aldynda barsha ata-analar aty­nan aı­tylǵan 7 balaly ananyń usyny­syn qoldaı­myn. Sózsiz, bizge ata-ana qaýymdas­tyǵyn qurǵan durys, dese de onyń fýnksııasy qazirgi komıtetterdeı tek qarjylyq problemany sheshetin uıym bolyp qalmaýy qajet. Adamdardyń nıeti ártúrli, tárbıe men bilimdi aqshamen baǵalaýǵa bolmaıdy. Qaýymdastyqty basqaratyn adam ábden ekshelgen jos­par­men jumysqa kirisýi kerek. Sonyń ishinde, balalarymyzdyń tekti, saýatty bolyp ósýi úshin arnaıy úıirmeler uıymdastyrýda qaýym­dastyqtyń yqpaldy bolǵanyn qalaımyn. Máselen, latyn gra­fı­kasyna kóshkeli jatyrmyz. Oǵan da qosymsha sabaq júrgeni jón.

Al aǵylshyn tilin ata-analardyń qalaýyna qaldyrý oń sheshim boldy. Ata-analardyń chatyndaǵy talqylaýdan-aq kózim jetip otyr, olardyń kóbisi men sekildi shet tilin 5 synyptan bastaýdy qolaı kóredi. Sebebi ózi ana tilin tolyq meńgerip, sóılep, jazyp, esep shy­ǵaryp úırenbegen bala ózge tildi qoıyrtpaqqa aınaldyratyny anyq.

 

Aqmola oblysy,

Qoıandy aýyly

Sońǵy jańalyqtar

Elimizde indet juqtyrǵandar sany 500-ge jetti

Koronavırýs • Búgin, 09:19

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar