Ýnıversıtet ujymy ǵalymdarymen, stýdentterimen, ánshi-jyrshylarymen, as-sýlarymen kelip, Jıdebaı basyn bir kún án men kúıge bólep, Quran-qatym túsirip, taǵylymy men tárbıelik máni zor «Abaı eline taǵzym» atty úlken forým ótkizdi. Bul forýmǵa Abaı aýdany ákiminiń orynbasary Baýyrjan Táttibekov bastaǵan Qaraýyl aýylynyń ardager-aqsaqaldary, zııaly qaýym ókilderi, «Qalamqas» halyq ansambiliniń ónerpazdary da qatysyp, eki ujym bir jaǵadan bas, bir jeńnen qol shyǵaryp, Jıdebaı jazyǵyn Abaıdyń óleńderimen, qara sózderimen sýsyndatty. Bul rette oblys ákiminiń orynbasary Ásem Núsipovanyń Sársen Amanjolov atyndaǵy Shyǵys Qazaqstan memlekettik ýnıversıtetiniń rektory Muhtar Tólegenniń bastamasyn qyzý qoldap, ýnıversıtet ujymynyń ıgi qadamdaryna sát sapar tilegenin, Abaı aýdanynyń ákimi Jarqynbek Baısabyrovtyń ýnıversıtet ujymyn qushaq jaıa qarsy alǵandyqtaryn da qosa aıta ketken jón.
Aqynnyń 175 jyldyq torqaly toıynyń alatyn orny erekshe bolmaq. Bul jóninde oblys ákimdiginde de úlken jıyn bolyp, óńir basshylary bizdiń bastamamyzdy qyzý qoldady. Sol jerde «Abaı eline taǵzym» atty forýmdy Abaı elinde, Jıdebaıda ótkizý jóninde sheshim qabyldandy. О́ıtkeni Abaı toıy Shyǵystan, Jıdebaıdan bastaý alýy kerek. Ýnıversıtetimizde Abaıdyń arnaıy dárishanasy jumys isteıdi. Abaıtaný kýrsy mindetti pán retinde oqytylýda. Abaı joly – máńgilik jol. Ol – eshqashan eskirmeıdi, eshqashan ólmeıdi. Ol – jańa bıikterge kóterile beredi», dedi Muhtar Tólegen.
Shara barysynda ýnıversıtet ujymy eńbek ardageri, Abaıdyń týysy Manataı Tolǵanbaevty, aqyn Tólegen Janǵalıevti, ustaz Baǵdat Esdáýletovany, «Qalamqas» halyqtyq ansambiliniń ánshisi Baqyt Shaǵataevany, Abaı, Shákárim poezııasy kúnderi shákirtteri únemi top jaryp júrgen ulaǵatty ustaz Raıgúl Tizginbaevany «Abaı» tósbelgisimen marapattady. Abaılyq kónekóz aqsaqaldar ult aqynyn ulyqtaý úshin О́skemennen arnaıy kelgen azamattarǵa alǵysyn jetkizdi. «Bul án – burynǵy ánnen ózgerek» demekshi, bul forýmnyń mádenı-tanymdyq máni de salmaqty boldy. Olaı deıtinimiz óskemendik stýdentter men ustazdar Abaı, Shákárim murajaılaryna saıahat jasap, Abaıdyń eli, uly tulǵalary, Abaı, Shákárim, Muhtar murasyna qatysty taǵylymdy áńgimelerge qanyqsa, jınalǵan qaýym «ShQO-nyń qasıetti jerlerin zertteýdegi S.Amanjolov atyndaǵy ShQMÝ-dyń úlesi» kórmesinen ólkemizdegi arheologııalyq qazba jumystarynyń nátıjeleri jaıly qundy maǵlumattarǵa qanyqty», deıdi Shyńǵystaýdyń aqsaqaly Manataı Tolǵanbaev.
О́skemennen kelgen Muhamedı meshitiniń ımamy Dýbek Qusmanuly Abaı, Shákárim jáne Muhtar rýhtaryna Quran baǵyshtalyp, qatym túsirildi. Kesene basynda bolyp, Abaı basqan topyraqty basyp, Abaı júrgen jolmen júrip ótken ýnıversıtettiń ǵalym-ustazdary men stýdentteri bul kúni erekshe kóńil kúıde boldy. Qazaqstandaǵy 100 kıeli mekenniń birine sanalatyn Jıdebaı olardyń boılaryna tyń kúsh quıyp, arman qustaryn Shyńǵystaý aspanynda sharyqtatty.
Sovet MAHMETOV,
ardager jýrnalıst
Shyǵys Qazaqstan oblysy,
Abaı aýdany
