Alańdatqany bylaı tursyn, túngi jaryqty tilip ótken qos zymyran memleketterdi soǵys jaǵdaıyna deıingi deńgeıge jetkizdi. Osylaısha bir aptanyń ishindegi bul úshinshi jarylys Seýl tarapynan Soltústik Koreıanyń áreketi «judyryq jumsaýǵa» daıynmyn degendi bildirip, AQSh pen Ońtústik Koreıanyń birlesken áskerı oqý-jattyǵýlaryna qyr kórsetýdeı áser qaldyryp tur.
Koreıa ortalyq telegraf agenttigi taratqan habarlamalarǵa qaraǵanda, «jańa qarýdy» synaqtan ótkizý sátin KHDR basshysy Kım Chen Yn janyna birneshe adam alyp, jeke baqylap turǵan.
«Ǵalymdar testilik baıqaý kezinde joǵary nátıje kórsetti jáne qarýlanýdyń túrleri de kóńilimizden shyǵyp otyr» delingen KHDR habarlamasynda. Alaıda qarýdyń túri týraly basqa málimetter belgisiz.
«Zymyrandar Soltústik Koreıanyń shyǵys bóliginen jiberilip, Japonııa men Koreı túbegi arasyndaǵy teńizge qulady. Zymyran 30 shaqyrymdyq bıiktikte 230 shaqyrym ushty», delingen resmı habarlamada.
Phenıannyń bul zymyryndary Ońtústik Koreıa tarapynyń da mazasyn qashyryp, «kez kelgen jaǵdaıǵa daıyn bolý» pozısııasyn ustanýǵa májbúr etti. Al Ońtústik Koreıa prezıdenti Mýn Chje In Phenıandy aımaqtaǵy jaǵdaıdyń aldyn alý sharalaryn nazarǵa alýdy surady.
Reuter-diń habarlaýynsha, bul – AQSh áskerılerin de dúr silkindirip, alańdatqan. Ońtústik Koreıa áskerıleriniń derekterine qaraǵanda, bul – AQSh pen Soltústik Koreıa basshylary arasyndaǵy kelissózderdiń sońǵy kezeńinen bergi altynshy oqıǵa.
Osy oraıda AQSh Bas departamenti AQSh-tyń Soltústik Koreıa boıynsha arnaıy ýákili Stıvan Bıgannyń osy aptada Japonııa men Ońtústik Koreıaǵa dereý attandyrylyp, KHDR denýklearızasııasy boıynsha is-jumystardy basshylyqqa alatynyn habarlady.
Áńgimeni aryǵa sozbaı-aq, prezıdent Donald Tramp ótken aptada ǵana Kım Chen Ynnyń barlyq kelisimder kúshinde ekenin, odan «óte ádemi qyzyl hat» alǵanyn jáne taǵy bir márte kezdesýden qashpaıtynyn málimdedi. Biraq bul habarlamalardyń barlyǵy da áli jiti taldaýdy qajet etedi.
Osy oraıda Ulybrıtanııa SIM basshysynyń orynbasary Hezer Ýıler ún qatyp, Londonnyń Soltústik Koreıa tarapynan atylǵan zymyrandarǵa qatysty túsinispeýshilik týyp otyrǵanyn jetkizdi.
«Biz Soltústik Koreıa tarapynan 16 tamyz kúni atylǵan ballıstıkalyq zymyrandarǵa alańdaýlymyz. Bul – BUU Qaýipsizdik Keńesiniń qararyna jat qylyq», – deı kele mınıstrdiń orynbasary Brıtanııanyń barlyq beıbit maqsattaryn kózdeıtin úlken kelissózderge ashyq ekenin málimdedi.
Buǵan deıin, atap aıtqanda, 2018 jylǵy 18 sáýirden bastap KHDR basshylyǵy barlyq ıadrolyq synaqtardy toqtatý týraly sheshim qabyldaǵanyn jazyp kelemiz. AQSh prezıdenti Donald Tramp pen Solústik Koreıa basshysy Kım Chen Ynnyń 2018 jylǵy maýsym aıyndaǵy birinshi sammıtinde birlesken qujat qabyldady. Atalǵan qujat Soltústik Koreıanyń tolyq denýklearızasııaǵa daıyn ekenin málimdegenimen, qandaı is-sharalardy naqtylaýy tıistigi týraly maqsattar eskerýsiz qalyp keldi.
Al byltyr qyrkúıek aıynda Phenıanda ótken sammıt aıasynda Ońtústik jáne Soltústik Koreıa memleketteriniń basshylary «Sohe» zymyrandyq synaq polıgonyn túpkilikti jabýǵa ýaǵdalasyp, ondaǵy synaq quraldarynyń kózin qurtýǵa kelisken edi.
Birqatar saıası sarapshy osy kelissózder bastalǵan tustyń ózinde Soltústik Koreıanyń sheshimderi senimsizdik týǵyza bastaǵanyn jazdy. Uzaq jyldar boıǵy býlyqqan saıası óshpendilik zarynyń ońaılyqpen óshe qoımasy da belgili edi. Negizi AQSh pen Soltústik Koreıa arasyndaǵy bul jylymyqqa áli de úlken úmit artatyndar bar.
BUU Qaýipsizdik Keńesiniń qarary boıynsha, Soltústik Koreıaǵa kez kelgen ballıstıkalyq zymyran synaǵyn ótkizýge qatań tyıym salynǵan.
