Ortalyq Azııa kóshpendileriniń dońǵalaqty, tar urshyqty toqyma beldigi men kıiz úıdi oılap tabýy adamzat qyzmetiniń mashına jasaý, jeńil ónerkásip, sáýlet óneri sekildi salalarynyń damýyna oń yqpal etti. Sonymen qatar kóshpendiler órkenıeti «saq-ań stıli», geometrııalyq, polıhromdy stılderdi qalyptastyrǵan ejelgi ónerdiń altyn besigi. Kóshpendiler mádenıeti dástúrleriniń sabaqtastyǵy qazaq oıý-órneginde jáne halyqtyń qoldanbaly ónerinde saqtalǵan.
– Qabyrǵa kilemder, túrli tuskıizder oıý-órnekterdiń jáne tústik sheshimderdiń kóptigimen baýraıdy. Ol otbasylyq oshaq pen amandyqtyń belgisi. Tuskıiz kıiz úıdiń basty kompozısııalyq sándi jabdyǵy. Kestelengen órnekter tumardyń sımvoldyq maǵynasyna ıe boldy. Kúrdeli kóp bólikten turatyn áshekeıli kilem kompozısııalarynda tiri tabıǵattyń beıneleri ejelgi kosmogonııalyq mıfterdiń jańǵyryqtary bar. Kestelengen buıymdardyń san alýan túrleriniń ishinde zermen tigilgen tósek japqyshtar erekshelenedi. Olar ósimdik mánerindegi keremet altyn jippen kestelengen. Jarqyraǵan paıetkalardyń baı áshekeıi bederlilik órnegin beredi, qara barqyt fonynda jaryq pen kóleńkeniń jylt-jylt etken oıynyn týdyrady, – deıdi mýzeıdiń qolóner bóliminiń jetekshisi Gúlaıym Jumabekova.
Bilikti sheberlerdiń qolynan shyqqan áshekeıli beldikterdiń basym bóligi bylǵarydan jasalǵan. Olar kúmis tilimdermen jáne asyl tastarmen kómkerilgen. Ejelgi nanym-senimde mundaı beldikter ıelerine densaýlyq pen kúsh-qýat beredi dep sanalǵan. Mundaǵy birden ózine baýraı túsetin tuskıizderdiń oıý-órnekti saryndary men polıhromdy gammasynda dala rýhy esetindeı.
ALMATY
