Sport • 22 Tamyz, 2019

Bilekti balýandar Nur-Sultanda beldesedi

27 retkórsetildi

Kúres álemindegi basty sporttyq oqıǵaǵa da bir aıdan az ýaqyt qaldy. 14-22 qyrkúıek aralyǵynda Qazaqstan elordasynda grek-rım, erkin jáne qyzdar kúresi boıynsha álem chempıonaty ótetini týraly buǵan deıin de jazǵan bolatynbyz. Nur-Sultandaǵy týrnır kelesi jyly Japonııa astanasy Tokıoda ótetin Olımpııa oıyndaryna joldama beretin alǵashqy irikteý saıysy bolatyndyǵymen erekshelenedi.

Álem chempıonatynda Olımpııa oıyndaryna joldama alý úshin elorda­ǵy «Barys Arena» muz saraıynda 100 eldiń myńǵa jýyq eń myqty degen balýany kúsh synasady. Mundaı aýqym­dy sporttyq is-shara sport qaýym­das­tyǵynda úlken qyzyǵýshylyq týdyrady. Sonymen qatar jahandyq birin­shilikke 200-ge jýyq BAQ ókilderi tirkelip, 7000-nan astam jankúıer baı­raq­ty básekege bılet alyp úlgergen.

Elordamyzǵa balýandardan bólek, álemdik dárejedegi mártebeli meımandar da atbasyn tiremek. Olardyń arasynda aralas jekpe-jektiń (UFC) aýyr salmaqtaǵy chempıony Denıel Korme, sondaı-aq Halyqaralyq Olımpıada komıtetiniń basshylyǵy da keledi dep kútilýde. Chempıonatqa qatysýshylar arasynda da kóptegen ataqty sportshy bar. Erkin kúres ókilderi arasynda 97 kılo salmaqtaǵy reseılik «Tank» Abdýlrashıd Sadýlaev pen amerıkalyq Kaıl Snaıder arasyndaǵy beldesýdi jankúıerler taǵatsyzdana kútip otyr. Sondaı-aq ıtalııalyq Frank Chamızo men amerıkalyq balýan Djordan Barroýzdyń arasynda da bozkilem ústinde tamasha beldesý ótýi múmkin. Úsh dúrkin Olımpıada chempıony, grek-rım kúresi boıynsha kýbalyq Mıhaın Lopez Nur-Sultanǵa Olımpıada joldamasyn jeńip alý úshin jáne Olımpıadanyń tórt dúrkin jeńimpazy, erler men qyzdar arasyndaǵy alǵashqy jáne jalǵyz ba­lýan japondyq Kaorı Ichoǵa teńesý úshin keledi.

Al kú­res túrlerinen álem chempıo­na­tyn uıymdastyrý komıtetiniń tóraǵasy Erlan Qojasbaı kúres tarı­hyn­­daǵy eń aýqymdy álem chempıona­tyn ótkizýdi jos­parlap otyrmyz deıdi. «Al­da jaýapty ic-shara kútip tur. Biz oǵan tolyǵymen daıynbyz dep senim­men aıta alamyn. Aldymyzda qoıyl­ǵan maqsat – kúres tarıhyndaǵy eń aýqymdy álem chempıonatyn ótkizý. Qazaq­standyq balýandarǵa keler bolsaq, birne­she kún buryn 65 kılo, 86 kılo, 92 kılo jáne 125 kılo salmaqtarynda erkin kúres sheberleri arasynda qory­tyn­dy beldesýleri ótkizildi. Osy sal­­maqtarda eki úmitkerden boldy. Alaıda ulttyq quramanyń bas bap­ke­ri Áset Serikbaev jáne keńesshi-jat­tyqtyrýshy Maırbek Iýsýpov bas­qa­ratyn jattyqtyrýshylar shtabymen eki ret jeńiske jetken, ádil tańdaý nátı­je­si boıynsha, álem chempıonatynda elimizdiń namysyn qorǵaıtyn ulttyq quramanyń sońǵy quramy anyqtaldy. Jattyqtyrýshylar quramy óziniń joǵa­ry biliktiligine saı, balýandarymyzdy durys fýnksıonaldy, fızıkalyq jáne moraldyq-psıhologııalyq kúıde álem chempıonatyna jetkizýine úmit artyp, sportshylarymyzdyń sapaly jáne ádemi óner kórsetetine senimdimiz», dedi uıymdastyrý komıtetiniń tóraǵasy Erlan Qojasbaı.

Qazirgi tańda álem birinshiligine qatysatyn erkin jáne qyzdar kúresiniń tolyq tizimi jarııalandy. Erkin kúresten Qazaqstan komandasynyń bas bap­ke­ri Áset Serikbaev Nur-Sultandaǵy álem chempıonatyna qatysatyn bal­ýan­­dardy atady. Joǵaryda atap ótken­deı bapkerler keńesi 65, 86, 92 jáne 125 kılodaǵy úzdik balýandy anyqtaý úshin qosymsha beldesýler uıymdastyrdy. 65 kıloda Dáýlet Nııazbekov pen Saıatbek Oqasov kúresip, tájirıbeli Dáýlet jeńiske jetti. Ol osy salmaqta álem chempıonatyna qatysý quqyǵyn jeńip aldy. Sondaı-aq 86 kılodaǵy Ádilet Dáýlembaev pen Azamat Dáýletbekov arasyndaǵy beldesýdiń jeńimpazy bolyp Ádilet tanyldy. 92 kılodaǵy Eraly Ábdirashev pen Nurǵalı Nurǵaıypulynyń arasyndaǵy kezdesý sońǵysynyń jeńisimen aıaqtaldy. 125 kıloda Oleg Boltın Iýsýf Batyrmurzaevtan basym tústi. Osylaısha, álem chempıonatyna qatysatyn balýandar qataryna qosyldy.

Erkin kúresten lısenzııalyq álem chem­pıonatyna qatysatyn Qazaqstan qu­rama­synyń tizimi: Nurıslam Sanaev (57 kg), Rasýl Qalıev (61 kg), Dáýlet Nııazbekov (65 kg), Nurǵoja Qaıpanov (70 kg), Danııar Qaısanov (74 kg), Ǵalymjan О́serbaev (79 kg), Ádilet Dáýlembaev (86 kg), Nurǵalı Nurǵaıypuly (92 kg), Álisher Erǵalı (97 kg) jáne Oleg Boltın (125 kg).

Sondaı-aq bas bapker Áset Serikbaev bizdiń balýandardyń basty qar­­sy­lastary týraly óz pikirimen bó­lis­ti. «Árıne, álemde myqtylar óte kóp. Erkin kúresten Reseıdiń bási myqty ekenin bilesizder. Odan bólek, Grýzııa, Ázerbaıjan, Iran quramalarynda belgili bir salmaqtarda álem úzdikteri bar. Bizdiń sportta amerıkalyqtardyń atoı salatynyn bilesizder. Degenmen, men jigitterge senemin. Bizde de jaqsy balýandar kóp. Eshkimdi bólip-jarǵym kelmeıdi. Meniń aldymda bári teń, bári birdeı. Kilemge shyǵatyn jigitterdiń barlyǵyna da úlken úmit artyp otyrmyn», dedi Á.Serikbaev.

Qyzdar kúresinen Qazaqstan komandasy bul kúnderi Reseıdiń Sochı qala­synda oqý-jattyǵý jıyndaryn ótkizýde. Bas bapker Nurlan Aman­qo­sovtyń aıtýynsha, álem chempıonatyna qatysatyn quram belgili. «Sochı qala­syn­da Reseı, Vengrııa, Estonııa jáne Fınlıandııa quramalarymen birlesken oqý-jattyǵý jıynyn ótkizip jatyrmyz. Daıyndyq jaqsy qarqynmen bas­taldy. Álemdik syn qarsańyndaǵy sońǵy jıyndy elde ótkizemiz. Nur-Sultandaǵy álemdik synǵa qatysatyn quram 90 paıyz anyqtaldy. Tek 53 kıloda kimniń kilemge shyǵatynyn sheshken joqpyz. Osy jıynnan soń naqty belgili bolady», dedi bas bapker.

Qyzdar kúresinen álem chempıonatynda el namysyn myna balýandar qorǵaıtyn bolady: Valentına Islamova (50 kg), Marına Sedneva (55 kg), Emma Tısına (57 kg), Madına Baqbergenova (59 kg), Aıaýlym Qasymova (62 kg), Aına Temirtasova (65 kg), Irına Kazıýlına (68 kg), Jámıla Baqbergenova (72 kg) jáne Elmıra Syzdyqova (76 kg).

Aıta keteıik, grek-rım, erkin jáne qyzdar kúresinen álem chempıonaty Qazaqstan astanasynda 14-22 qyrkúıek aralyǵynda ótedi. Bıletterdi
Kassir.kz, Ticketon.kz jáne Zakazbiletov.kz saıttarynan satyp alýǵa bolady. Álem chempıo­naty bıletteriniń quny 1000 teńgeden bastalady.

 

Banner
Sońǵy jańalyqtar

Eli qoldaǵan qundy qujat

Qazaqstan • Búgin, 09:02

Damýdyń sapaly kezeńi

Qazaqstan • Búgin, 09:01

Halyq únine qulaq asatyn memleket

Qazaqstan • Búgin, 08:57

«Qazaqmys» jospardy asyra oryndamaq

Ekonomıka • Búgin, 08:55

Turar týraly tolǵady

Rýhanııat • Búgin, 08:53

Ataýlar men esimder – eldiktiń belgisi

Qazaqstan • Búgin, 08:51

Altyn Orda tarıhy tarazylandy

Rýhanııat • Búgin, 08:48

Temir jol tasymaly jetildirile túsedi

Qazaqstan • Búgin, 08:43

Bir ótinishpen – birneshe qyzmet

Qazaqstan • Búgin, 08:42

Bolgarııada ótken basqosýǵa qatysty

Parlament • Búgin, 08:37

Qaterli isiktiń aldyn alýǵa bolady

Medısına • Búgin, 08:30

EAEO: endigi daý kómirge qatysty

Álem • Búgin, 08:26

Masyl bolma, asyl bol!

Qazaqstan • Búgin, 08:25

Benzın qymbattaı ma?

Qazaqstan • Keshe

«Syryńdy aıtshy, dúnıe...»

Rýhanııat • Keshe

Eń qysqa áńgime. Yrysbek Dábeı

Eń qysqa áńgime • Keshe

Eń qysqa áńgime. Amangeldi Seıithan

Eń qysqa áńgime • Keshe

Eń qysqa áńgime. Serjan Zákeruly

Eń qysqa áńgime • Keshe

Eń qysqa áńgime. Janat Jańqashuly

Eń qysqa áńgime • Keshe

Kitap oqyp, rýhanı baı bol

Qazaqstan • Keshe

Juldyzdaı aǵyp ótken

Aımaqtar • Keshe

«Kóktem aýylynyń» aqsaqaly edi

Rýhanııat • Keshe

Abaı ulaǵaty – urpaqqa amanat

Rýhanııat • Keshe

Qyrǵyz eli Abaıdy ardaqtady

Rýhanııat • Keshe

Uqsas jańalyqtar