Jaqynda Nur-Sultan qalasynda HPAIR Asia Conference 2019 (The Harvard College Project for Asian and International Relations), ıaǵnı Azııa halyqaralyq jastar konferensııasy ótken bolatyn. HPAIR uıymy men Garvard ýnıversıtetiniń óner jáne ǵylym fakýlteti jáne Nazarbaev Ýnıversıteti birlese uıymdastyrǵan sharaǵa Shyǵys Qazaqstandaǵy iri óndiris orny – «Qazsınk» kompanııasy da qatysyp, konferensııanyń oıdaǵydaı ótýine atsalysty.
Aıta keteıik, stýdentterdiń halyqaralyq konferensııasy óziniń 28 jyldyq tarıhynda 12 memlekette, onyń ishinde Ortalyq Azııada jáne postkeńestik elder arasynda Qazaqstanda alǵash ret ótkizilipti. Uıymdastyrýshylardyń aıtýynsha, bes kúnge sozylǵan halyqaralyq konferensııada ǵalamdyq naryqtar jáne ekonomıka, kórkemóner, BAQ jáne mádenıet, áleýmettik saıasat jáne ádilettilik, energetıka jáne ekologııalyq turaqtylyq, basqarý jáne geosaıasat, ǵylymı tehnologııalar sekildi mańyzdy taqyryptar jan-jaqty talqylanǵan.
Álemniń 65 eliniń 500 stýdenti men jas mamandarynyń basyn qosqan konferensııada qatysýshylar ózekti taqyryptardy talqylap qana qoımaı, keıs-chempıonatqa qatysyp, baqtaryn synap kóripti. Bul rette sharanyń bas demeýshileriniń biri «Qazsınk» kompanııasy delegattar nazaryna óndiristegi qaýipsizdik mádenıeti taqyrybynda oılaryn ortaǵa salypty. «Osyndaı aýqymdaǵy jastardyń halyqaralyq konferensııasyn qoldaǵanymyzǵa qýanyshtymyz. Búginde sıfrlandyrý qoǵamnyń barlyq salasyna endi. Jastar – qoǵamdy alǵa súıreýshi úlken kúsh. Bizdiń kompanııa talantty jastardy qoldaýǵa árdaıym erekshe kóńil bóledi. Qazir biz birneshe sıfrlyq jobalardy engizip jatyrmyz, qoldanysqa engen jobalardy konferensııa delegattarynyń nazaryna usyndyq» deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
Shyǵys Qazaqstan oblysy
