Mine, birneshe kún boldy, qyrǵyz eliniń Ystyqkól oblysyndaǵy Jeńis shyńyna shyǵyp, tosynnan buzylǵan tabıǵat raıynyń qursaýynda qalǵan qazaqstandyq alpınıster jan-jaqty izdestirilip jatyr. Aıyr qalpaqty aǵaıyn Jenısh shoqysy ataıtyn bul shyń – Tıan-Shan taýlary júlgesindegi eń bıik núkte. Tipti elimizdiń eń joǵary núktesi sanalatyn Han Táńirinen de jarty shaqyrymdaı joǵary ornalasqan. Qudaıdyń ýysynda, Táńirtaýdyń qýysynda – qazaqstandyq alpınısterdiń qandaı qıyn jaǵdaıda qalǵanyn osydan-aq baǵamdaýǵa bolar. Olar, naqty aıtqanda almatylyq Murat О́tepbaev pen Andreı Korneev sońǵy ret shyń basynan túsip kele jatqanda, 6600 metr bıiktikten radıobaılanys arqyly habarlasyp, áriptesteri Aleksandr Chechýlınniń ókpesine tıgen sýyqtan qaza bolǵanyn, ózderiniń shatyrlaryn taýdyń doly jeli ushyryp ketkendikten, qardy arshyp panalaǵandaryn jetkizgen. Olar oqys jaǵdaıǵa 15 tamyzda tap bolǵan edi. Odan beri bir apta ótti. Qutqarýshylar taýdaǵy qatań klımattyń qaıta-qaıta buzylýynan izdestirý-qutqarý jumystaryn álsin-álsin toqtatýlaryna týra keldi, degenmen tikushaqtar arqyly taýdyń tósin áldeneshe márte aınala ushyp shyqty. Al Almaty alpınızm federasııasy áriptesterin endigi qutqarý múmkindigi de qalmaǵanyn málimdedi. Olar tipti 21 tamyzda tikushaqpen sońǵy múmkindikti paıdalanyp kórgennen soń izdeý-qutqarý jumystary toqtatylatynyn jetkizip, alpınısterdiń et jaqyndaryna kóńil de aıtty.
Almatylyq alpınıster 18 tamyzda bazalyq lagerge oralmaǵan soń qazaqstandyq áskerı alpınıster Maqsut Jumaev, Amanjol Rahmetov jáne Vasılıı Pıvsov 19 tamyzda Qyrǵyzstanǵa baǵyt alyp, 2,2 myń metrlik bıiktiktegi bazalyq lagerge jetken bolatyn. Kómekke qyrǵyzstandyq jáne reseılik alpınıster de qosyldy. 20 tamyzda elimizdiń IIM Tótenshe jaǵdaılar komıtetiniń tikushaǵy qutqarýshylar tobyn 4,5 myń metr bıiktiktegi bazalyq lagerge jetkizdi. Olar ári qaraı jaıaý órledi. Alaıda, alpınıster toby men joǵalǵan sportshylardyń týysqandary mingen tikushaqpen teplovızor quralyn qoldana otyryp, 5200-6400 metr bıiktikte júrgizilgen izdeý jumystary nátıjesiz aıaqtaldy. Alpınısterdi qutqarý operasııasy keshe qaıta jalǵasty. Tótenshe jaǵdaılar komıtetiniń ókilderi birneshe kúngi tolassyz jaýyn-shashynnan soń taýdaǵy tabıǵat raıy da syńǵyrlap, erekshe ashyq bolyp turǵanyn habarlady. Joǵalǵan alpınısterdiń týǵan-týystary da úmit úzbeı, izdeý jumystaryn toqtatpaýdy janushyra surap otyr.
Shirkin, úmit! Adamnyń úmiti sónbesin! Úmit – úlken kúsh. Úmit – dátke qýat. Úmit alǵa jeteleıdi.
Adamzattyń aıaǵy tımegen jer bar ma? Planetanyń bıik núktelerin osy jetimyńdyq, segizmyńdyq kókke shanshylǵan shyńyltyr shyńdar qurasa, sonyń túgeline derlik adam balasynyń tabany tıgen. Tipti shet-shegi joq ǵarysh saparlarynan da, muhıt túbindegi áldeneshe mıllıardtaǵan tonna sýdyń qysymy bar tereń oıpattarǵa da baryp, din aman oralyp júr. Biraq onyń bárinde adam aqyl-oıynyń tamasha jetistikterinen týǵan tehnologııa paıdalanylady. Al jalama jartastarda janyńdy jaldap, jankeshtilikpen qyran qanat qaǵa almas qııaǵa shyǵý, atmosferany attap ótip, ottegiden ada, tynys alý múmkin emes keńistikke kóterilý, bas aınalar qulama quzdardan qulap ketpeı, shorlanǵan kók muzdy, qasat qardy qaq jara tike órleý, aqyrǵan aıazben arpalysa, doldanǵan daýylmen dodaǵa túse aspantaýlardyń alqymynda alǵa jyljý úshin sarqylǵan kúshke dármen beretin, sansyraǵan sanaǵa qýat beretin ne qudiret? Bul – rýh! Adamǵa ǵana tán jasampaz rýh! Qansha fızıkalyq turǵydan múmkin bolmasa da, ǵaıyptan taıyp bir bolatyn ǵalamat adam rýhynyń ómirsheńdiginen úmittengiń keledi... Bizdiń alpınısterimizdi de saqtasa, osy bir aıaly úmit, tozbas rýh saqtaıdy!
