Kúrish oraǵynyń bastalý rásiminde Shıeli aýdanynyń ákimi Áshim Orazbekuly bıylǵy aýylsharýashylyq jylynyń ereksheligi men ala jazdaı dala alqabynda tynymsyz eńbek etken dıqandardyń tolymdy eńbegine laıyqty baǵa bere otyryp, jıyn-terimniń sátti ótýin tiledi. Aýdan basshysy ár jyldyń ózindik kúrdeliligi bolaryn aıta kele, sol qıynshylyqtardy jeńýde dıqandar qaýymynyń qajyrlylyǵy men beınetkeshtigine súısinetinin jetkizdi. Sondaı-aq Jańaqorǵan aýdanynyń ákimi Ǵalym Ámireev, Shıeli aýdany qoǵamdyq keńes tóraǵasy Perdáli Arhabaevtar quttyqtaý sóz sóıledi. «Bestam eli» sharýa qojalyǵynyń tóraǵasy Baltash Qoshqarov jıyn-terimniń qysqa merzimde aıaqtalaryna ýáde berip, áriptesterine qyrmandarynyń dóńde bolýyna tilek aıtty.
Bıyl Shıeli aýdanynyń eginshileri 12 475 gektar kólemge baıyrǵy daqyl syr salysyn ornalastyrsa, mamandardyń boljamynsha onyń 70 paıyzdan astamy joǵary ónim berýge laıyq. Sondaı-aq «Aqmaıa», «Tóńkeris-K», «Bıdaıkól» sekildi irgeli sharýashylyqtar mol ónim alýǵa sapaly jumys uıymdastyra bildi. Munan ózge jańa jáne eski jońyshqa kólemi 9 myń gektardyń ústinde. Kúrish oraǵy men jońyshqa shóbin daıyndaý jumystary qatar júrgizile beretindikten túrli kombaındar men qajetti tehnıkalardyń saqadaı saı bolýy eńbek ónimdiligin arttyrary sózsiz. Munyń aldyn ala jasalǵan josparǵa saı ekenin sharýashylyq tóraǵalary men aýdandyq aýylsharýashylyq bólimi mamandarymen pikirlesý barysynda kóz jetkizdik. Taǵy da aıtar nárse, baqsha, kókónis ónimderin jınaý jumystary da Shıeli aýdanynda uıymshyldyqpen atqarylyp kele jatqany. Bul daqyldar kólemi 2 myń gektarǵa taıaý. Iаǵnı, dala akademıgi atanǵan, eki márte Eńbek Eri Ybyraı ata Jaqaevtyń izbasar jerlesteri eginshilik salasynyń mánin ortaıtpaı qyzý jumys ústinde ekendigi kópke úlgi bolarlyq. Bul týraly belgili aıtys aqyndary Kenjebaı Júsipov pen Erjan Ámir kesteli sózben oı órnektedi.
Kombaındar kúrish alqabynda zyrǵı jónelgende mundaǵy astyqtyń bitiktigine súısingen ardagerler aq batalaryn berip jatty. Al qojalyq ujymdary egis oraǵyna qatysýshylarǵa arnap aq dastarqan jaıyp, qonaqtarǵa dám-tuzyn usyndy. Aýdandyq mádenıet bóliminiń ónerpazdary óz ónerlerimen kelgen meımandardyń men eginshilerdiń kóńilin serpiltti.
Nurmahan ELTAI
Qyzylorda oblysy,
Shıeli aýdany
