Syrtqy ister mınıstri Beıbit Atamqulov Germanııaǵa alǵashqy resmı sapary aıasynda Qazaqstan-nemis iskerlik «dóńgelek ústelin» ótkizdi. Is-sharaǵa German ekonomıkasynyń Shyǵys komıteti jáne jalpy kapıtaldandyrý 180 mlrd dollar bolatyn 20 nemis kompanııalardyń ókilderi qatysty. Olardyń ishinde Linde Group, GEA Group, Deutsche Post, TUI Group, CLAAS KGaA mbH, Schaeffler Technologies AG & Co. KG, Deichmann SE, LEMKEN GmbH & Co. KG, sondaı-aq Tönnies Holding ApS & Co. KG, Böhmer GmbH sekildi transulttyq kompanııalar.
«Dóńgelek ústel» qatysýshylary ekijaqty kelissózder júrgizip, eldiń ınvestısııalyq klımatyn, Qazaqstandaǵy jumys tájirıbesin talqylap, mashına jasaý, agroónerkásip kesheni, munaı-gaz hımııasy, qurylys, kólik, jeńil ónerkásip salalaryndaǵy ózara tıimdi yntymaqtastyq perspektıvalaryn belgiledi.
Syrtqy ister mınıstri elimizdiń ekonomıkasynyń negizgi damý baǵyttary týraly egjeı-tegjeıli baıandap, nemis bıznesine ındýstrııalandyrý, sıfrlandyrý, «qarapaıym zattar» ekonomıkasy baǵdarlamalaryn iske asyrýǵa, «Jasyl ekonomıka» bazasyn qurýǵa jáne «Astana» Halyqaralyq qarjy ortalyǵynyń jumysyna belsendi qatysýdy usyndy.
Elbasynyń 2012 jyly Berlınge sapary aıasynda Shıkizat, ónerkásip jáne tehnologııalyq salalardaǵy áriptestik týraly qol qoıylǵan kelisimi mańyzdy ról atqarady.
Talqylaý barysynda «Kazakh Invest» UK» AQ» Basqarma tóraǵasynyń orynbasary Rýstam Isataev Qazaqstandaǵy german kompanııalary úshin ınvestısııalyq múmkindikti, ósý perspektıvalary jáne ınvestısııalyq qyzmetti memlekettik qoldaý sharalary týraly habarlady. Onyń aıtýynsha, búgingi kúni Qazaqstanda óz jobalaryn iske asyrýǵa qyzyǵýshylyq tanytqan bes kompanııamen belsendi kelissózder júrgizilýde.
German tarapynyń spıkerleri Qazaqstandaǵy jumysynyń tájirıbesi týraly aıtyp, EAEO, Qytaı, Taıaý Shyǵys, Ortalyq Azııa naryqtaryna qol jetkizý artyqshylyqtary jáne bıznes pen ınvestısııalardy keńeıtý úshin jasalǵan múmkindikterdi joǵary baǵalady. German kásipkerleri Qazaqstannyń agroónerkásip keshenine mal sharýashylyǵy jáne tamaq ónerkásibinen bastap aýylsharýashylyq mashına jasaý, zyǵyr maıyn jáne mıneral tyńaıtqyshtardy óndirýge deıin erekshe qyzyǵýshylyq tanytty.
«CLAAS KGaA mbH» kompanııasynyń Qadaǵalaýshy keńesiniń tóraǵasy, German ekonomıkasynyń Shyǵys komıteti Basqarma tóraǵasynyń orynbasary Katrına Klaas-Mıýlhoızer eki el arasyndaǵy saýda-ekonomıkalyq áriptestiktiń ońdy damý dınamıkasy týraly atap ótti: «Búgingi kúni Qazaqstan Ortalyq Azııadaǵy eń mańyzdy seriktes bolyp sanalady. Jańa fýnksııalar Syrtqy ister mınıstrliginiń quzyretine ótken kúnnen bastap aramyzdaǵy áriptestik artyp jatyr».
«Deutsche Post International» kompanııasynyń Vıse-prezıdenti Iýrgen Lomeıer elimizdiń kóliktik-logıstıkalyq salasy damýynyń oń úrdisteri týraly aıtyp, sońǵy 5 jylda Qytaıdan Eýropaǵa jáne keri baǵytta Qazaqstan aýmaǵy boıynsha júk tasymalynyń kólemi aıtarlyqtaı ulǵaıǵanyn atap ótti.
Taraptar ınvestısııalyq yntymaqtastyǵyn arttyrý boıynsha Jol kartasyn ázirleýge, sondaı-aq birlesken strategııalyq jobalardyń tizbesin jasaýǵa kelisti.
Qazaqstan delegasııasyna Aýylsharýashylyǵy ministriniń birinshi orynbasary Aıdarbek Saparov, Soltústik Qazaqstan oblysy ákiminiń birinshi orynbasary Marat Tasmaǵanbetov, «KEGOC» AQ, «QazAgro» UBH» AQ, «Qazgeologııa» AQ, «BRK-Lızıng» AQ, «Kazakh Invest» UK» AQ, «Agromashholdıng» AQ-nyń basshylary jáne taǵy basqa Qazaqstan isker toptarynyń ókilderi qatysty.
