Osy rette Elshi Qazaqstannyń aýyl sharýashylyǵy men agro-ónerkásip kesheni týraly keńinen áńgimelep, bul salalardy damytý baǵytynda Úkimet tarapynan qabyldanyp jatqan sharalar týraly aqparattandyrdy. Sonymen qatar ol elimizde sheteldik ınvestorlarǵa beriletin jeńildikter, olardyń quqyqtary men ınvestısııalaryn qorǵaıtyn zańnama men tetikter jóninde aıta otyryp, kompanııa basshylyǵynyń nazaryna aýyl sharýashylyǵy salasyndaǵy birqatar ınvestısııalyq jobalardy usyndy.
Buǵan qosa Qazaqstannyń Tuńǵysh Prezıdenti - Elbasy Nursultan Nazarbaevtyń bastamasymen qurylǵan Azyq-túlik qaýipsizdigi jónindegi ıslam uıymy (AQIU) men Astana halyqaralyq qarjy ortalyqtarynyń qyzmetimen tanystyrdy.
SALIC basshysy M.Djensen elimizdiń aýyl sharýashylyǵy, agro-ónerkásip salasyndaǵy ınvestısııalyq múmkindikter týraly aqparatty úlken qyzyǵýshylyqpen qabyl alyp, Qazaqstanmen ózara tıimdi yntymaqtastyq ornatýǵa múddelilik tanytty.
Kezdesý qorytyndysy boıynsha kompanııa delegasııasynyń elimizge saparyn uıymdastyrý týraly ýaǵdalastyqqa qol jetkizildi.
SALIC Koroldiktiń azyq-túlik qaýipsizdigin qamtamasyz etý maqsatynda qurylǵan, quryltaıshysy SAK Memlekettik ınvestısııalyq qory bolyp tabylady. Kompanııa aýyl sharýashylyq ónimderin ósirýge jáne mal sharýashylyǵyn júrgizýge qolaıly shet elderge ınvestısııalar salýmen aınalysady. Alǵan ónimderin Saýd Arabııasyna ımporttaıdy. Búgingi tańda SALIC Kanada, Avstralııa, Ýkraına, Eýropa jáne basqa elderde iri ınvestısııalyq jobalardy júzege asyrýda.
