Birinshiden, qoǵamda kóptep talqylanyp jatqan mańyzdy mindet — bul ásirese, JOO-lardaǵy sybaılas jemqorlyqtyń aldyn alý jáne onymen kúres.
«Qazir QR BǴM birneshe baǵyt boıynsha júıeli jumystar atqaryp jatyr. Bıyl magıstratýraǵa túsý boıynsha jańa format engizildi. Ol jaqsy nátıjeler berdi. Biz sybaılas jemqorlyqpen kúres agenttigimen, qoǵammen birge ashyq ádil emtıhandar ótkizdik», — dedi mınıstr.
Sonymen qatar, JOO-lardyń sapaly bilim berýin qamtamasyz etý maqsatynda úsh ýnıversıtet tekserildi. Búginde osy oqý oryndarynyń lısenzııalaryn toqtatý týraly másele sheshilip jatyr.
Taǵy bir mindet — sessııalardy, emtıhandardy tapsyrý kezinde sybaılas jemqorlyqpen kúresý. Osy maqsattarda jobalyq keńse — Adal bilim jumys isteıdi, onda BAQ, qoǵam ókilderimen, belsendilermen birlesken jumys atqarylady.
A. Aımaǵambetov sonymen qatar stýdent jastardy jataqhanalarda oryndarmen qamtamasyz etý boıynsha atqarylyp jatqan jumystar týraly aıtyp berdi. 75 myń orynǵa stýdentter jataqhanasyn salý mindeti qoıylǵan edi.
QR BǴM málimetteri boıynsha, bıyl josparlanǵan 5 myń orynnyń ornyna 8 586 oryn engiziledi. Iаǵnı, jospar 172% oryndalady.
«Qazir biz 4,5 myń oryndy tapsyrdyq. Jyl sońyna deıin 8,5 myń jańa oryndy paıdalanýǵa berýdi josparlap otyrmyz. Bul baǵyttaǵy jumystar qarqyndy júrip jatyr. Biraq bizdiń aldymyzda osy jumystardyń tetigin jetildirý mindeti tur», — dedi mınıstr.
Jumys istemeıtin jastardy oqytýmen qamtý úshin 2017 jyldan bastap «Barshaǵa arnalǵan tegin tehnıkalyq jáne kásiptik bilim berý» jobasy iske asyrylýda.
«Qazir biz osy jobanyń nátıjelerin kórip otyrmyz. Birinshiden, tek osy joba boıynsha qamtý 30%-ǵa artty ( 2017 jyldan beri 200 myńǵa jýyq adam oqytyldy, onyń ishinde halyqtyń 70%-y áleýmettik aljýaz toptarynan). Ekinshiden, eger osy jobany iske asyrǵanǵa deıin bilim alýshylar kolledjderden tek bir ǵana mamandyq alyp shyǵatyn bolsa, qazir sondaı ýaqyt ishinde 3 mamandyqqa deıin alyp shyǵa alady», — dedi A. Aımaǵambetov.
Sonymen qatar mınıstr aýyl jastaryn belsendi jumyspen qamtý sharalarymen qamtý maqsatynda mobıldi toptar jumys isteıtinin aıtty. Mobıldi oqytý ortalyqtary shalǵaı eldi mekenderde jumys isteıtin bolady. Sonymen qatar, bıyl 1 qyrkúıekten bastap jumysshy mamandyqtarǵa oqıtyndardyń shákirtaqysy 30%-ǵa arttyrylady.
Ulttyq joǵary oqý oryndarynyń rektorlaryn taǵaıyndaý júıesiniń ózgerýi týraly suraqqa jaýap bere otyryp, Ashat Aımaǵambetov kútiletin nátıjelerdi túsindirdi.
«Sizder biletindeı, buryn olardy Memleket basshysy taǵaıyndaıtyn. Endi olar konkýrs arqyly taǵaıyndalatyn bolady. Bul ne beredi? Birinshiden, ashyqtyq. Ekinshiden, básekelestik. Úshinshiden, qoǵam aldyndaǵy úlken jaýapkershilik jáne qoǵamnyń osy proseske qatysýy. Jas kadrlarǵa kelsek, olardyń qatysýy qoldalady. Jalpy, jasyna, múmkindikterine t.b. qaramastan azamattar osy konkýrsqa qatysa alady», — dep túsindirdi mınıstr jáne komıssııa sheshimder qabyldaýda merıtokratııa qaǵıdatyn basshylyqqa alatynyn atap aıtty.
