Olardyń jekpe-jegi Reseıdiń Chelıabi qalasyndaǵy "Traktor" arenasynda boks keshiniń basty kezdesýinde ótti. Kovalev óziniń týǵan qalasynda alǵash ret jekpe-jek uıymdastyrdy, jalpy ol Reseıde nebári úsh kezdesý ótkizgen. Iаrd bolsa sporttyq mansabynda alǵash ret óz eliniń shekarasynan shyqty.
Jekpe-jek 11-shi raýndta aıaqtaldy. Kovalev kúshi sarpylǵan qarsylasyn nokaýtqa túsirdi. Segizinshi raýndta ulybrıtanııalyq boksshy sál bolmaǵanda reseılikti esinen tandyrýǵa az qalǵan edi. Biraq ol gongqa deıin shydap baqty, sosyn basymdyqty óz qolyna aldy.
36 jastaǵy Kovalev úshin bul 34-shi (29 nokaýt) jeńis, ol úsh ret jeńilgen jáne bir ret teń túsken. Al 27 jastaǵy Iаrd sporttyq mansabynda alǵash ret jeńildi. Osyǵan deıin ol 18 kezdesýde jeńimpaz bolyp, onyń 17-in merziminen buryn aıaqtaǵan. Osy kezdesý úshin Kovalev bes mıllıon dollar, al ulybrıtanııalyq úsh mıllıon dollar alady. Kovalev WBO belbeýin 2 aqpanda qaıtarǵan edi. Ol kolýmbııalyq Eleıder Alvaresti revansh kezinde jeńdi.
2013-2016 jáne 2017-2018 jyldary aralyǵynda osy belbeý reseıliktiń ıeliginde bolǵan.
Budan da buryn habarlaǵanymyzdaı, osy boks keshiniń anderkartynda kásipqoı boksta orta salmaqta óner kórsetip júrgen qazaqstandyq boksshy Meıirim Nursultanov reseılik Artýr Osıpovty jeńdi. 26 jastaǵy Nursultanov sporttyq mansabynda 11 kezdesý ótkizip, barlyǵynda da jeńiske jetti. Segiz kezdesýdi merziminen buryn aıaqtady.
Al 30 jastaǵy Osıpov osymen ekinshi ret jeńildi, ol 15 ret (10 nokaýt) jeńiske jetken.
