Legıonerler ornyna – jergilikti sportshylar

Teriskeılikterdiń túrli baı­raqty jarystardaǵy kór­set­­kishteri de aýyz tolty­ryp aıtar­lyqtaı. 413 sportshy elimiz­diń ulttyq quramalaryna qabyldanyp, sátti óner kórsetip júr. Bıyl 17 halyqaralyq, 34 respýblıkalyq dodalarǵa qaty­syp, 266 medal ıelenýi – osy sózimizdiń aıǵaǵy. Olar­dyń arasynda erkin kúresten Azııa chempıo­ny Nurǵoja Qaıpa­nov­­tyń, sary qur­lyq­­tyń qola júldegerleri, je­ńil atletshiler Margarıta Muqa­she­va men Mıhaıl Lıtvın­niń, áıelder kúresinen Azııa birinshiliginde úshinshi orynǵa taban tiregen Ekaterına Fırsto­va­nyń, «Astana» kásipqoı velo­koman­dasynyń beldi músheleri Alekseı Lýsenko, Jandos Bıjigitov, Artem Zaharovtyń, gir kóterýden Eýropa jeńim­pa­zy Artem Golovınniń, taǵy basqalarynyń esimderi qur­met­pen atalady.

О́tken ǵasyrdyń toq­sa­nyn­shy jyldary óńirde nebári 10-ǵa jýyq balalar men jas­óspi­rimder klýby bolsa, búginde 30-ǵa jýyqtaǵan. Sońǵy jyldary oblys ortalyǵynda ámbe­bap sport saraıy, zamanaýı tennıs ortalyǵy, eki aýdanda dene shynyqtyrý jáne sport kesheni paıdalanýǵa berilse, Aıyrtaý, Aqjar aýdandarynda «Aýyl – el besigi» baǵdarlamasy sheńberinde salynýda. Júz­den astam shaǵyn fýtbol alań­da­ry men hokkeı korttary tur­ǵyzyldy. Qazaq kúresinen «Qy­zyl­jar arlandary», at sporty jáne ulttyq oıyn túrlerinen «Tulpar» kásibı sport klýbtary jumys isteıdi. Taıaý arada olımpıadalyq rezervtegi mamandandyrylǵan mektep-ınternat-kolledji ashylmaq.

Desek te, salamatty ómir saltyn qalyptastyrý baǵytynda atqarylatyn jumystar áli az emes. Ony ákimdiktiń otyrysynda aımaq basshysy Qumar Aqsaqalov sanamalap berdi.

– Birinshiden, sportta jaraqat alý jıi kezdesedi. Osy sebepti sportshylar úshin kásibı dárigerler daıarlaýdy, shtattyq rejimde jumys isteýin qamtamasyz etý kerek. Ekinshiden, balalar men jasóspirimder mektepteriniń materıaldyq-tehnıkalyq baza­sy­nyń jabdyqtalýy kóńil kón­shit­peıdi. Bul oraıda sporttyń nátı­jesimen qosa, áleýmettik jaýap­kershiligi de óte mańyzdy. Aqjar, M.Jumabaev aýdandarynda sporttyq saıystarǵa tıisinshe bar bolǵany 349 myń, 421 myń teńge ǵana qarastyrylǵan. Úshinshiden, olımpıadalyq sport túrlerine ǵana basymdyq berilip, buqa­ra­lyq jaǵy kenjelep jatady.

О́z basym jergilikti sport­shy­lardyń jyl boıy túrli ja­rys­tarǵa baryp turýyna qa­ra­jattyń qajetti mólsherde bólin­be­ýin túsinbeımin. Kerisinshe, barlyq klýbtar sportshylardy syrttan, shetelden shaqyrýǵa qumar. Menińshe, olarsyz-aq joǵary nátıjelerge qol jetkizýge bolady. Máseleni tek legıonerler arqyly sheshemiz deý, esh aqylǵa syımaıdy. Sheber sport saıypqyrandaryn daıyndaý –sizderdiń mindet­te­rińiz. Qıt etse reıtıng qýý­ǵa beıimbiz. Ol satydan túsip qalsaq, eshteńe etpeıdi. Demek, deńgeıimiz sol bolǵany. Birer jylǵa keletin adamǵa qyrýar qarjy shashamyz. Ol aqshany ózimizdiń sportshylarǵa berińizder, – deı kelip, Qumar Irgebaıuly legıonerler alýǵa tyıym salatynyn kesip aıtty.

Dene shynyqtyrý jáne sport basqarmasynyń basshy­sy Rýslan Esenalınniń 9 sport klýbynyń quramynda 924 sport­shy jattyǵady, olardyń 855-i jergilikti, 65-i basqa óńir­ler­den degenine keliseıik. Al 4-ýi ǵana legıoner deýi kúmán týdyr­maı qoımaıdy. Máselen, Qazaq­stan­nyń kýbogyn eki ret jeńip alǵan «Qulager» hokkeı klýby sapyndaǵy oıynshylardyń basym bóligi – reseılikter. Sol sııaqty «Qyzyljar-SK» fýt­bol klýbynda da syrttan shaqyrylǵan aıaqdop sheber­le­ri­niń úlesi kóp.

Sózi men isi úılesken oblys áki­miniń talaby oryndalaryna, jergilikti sportshylar úshin barlyq jaǵdaı jasalaryna seneıik.

Soltústik Qazaqstan oblysy