Atalǵan iske aýyldan alty shaqyrym jerdegi keńestik kezeńde salynǵan shaǵyn kópirdiń ábden eskirip, tozyǵy jetkeni sebepshi boldy. Ásirese kóktemde sý tasyǵan kezde jáne kúzdiń jaýyndy-shashyndy laısań ýaqyttarynda júlge saı ótkel bermeı kóptegen kedergiler keltirip júretin. Sonyń saldarynan aýyl adamdary okrýg ortalyǵyna aınalma jol arqyly qatynaýǵa májbúr edi. Sondyqtan turǵyndar óz aralarynan qarajat jınaqtap, oǵan qajetti materıaldar satyp aldy da, kópir salýǵa bir kisideı jumyla kiristi.
Asarlatyp salynǵan ótkeldiń sapasy da umyt qalǵan joq. Sóıtip eki araǵa tórt qatardan turatyn temir turba tóselip, qýystyń bári qıyrshyq taspen toltyryldy. Budan keıin onyń ústi sementpen bekitildi. Saýaby mol isti uıymdastyrýǵa aýyl kásipkerleri Ǵalymjan Nókisov pen Qaırat Qaldyǵulovtar uıytqy bolǵanyn aıta ketelik. Eki azamat kópir salýǵa jeke tehnıkalaryn jumyldyrdy. Bir jaǵadan bas, bir jeńnen qol shyǵaryp, qarqyndy qımyldaýdyń nátıjesinde kópir nebári bes kúnniń ishinde salynyp bitti.
Kóldeneń Temir aýylynda 44 otbasy turady. Sapar barysynda aýyl jastarynyń qalaǵa jumys izdep ketkendikten, týǵan topyraqta negizinen egde tartqan erli-zaıyptylar ǵana qalǵanyn baıqadyq. Aýyldaǵy shaǵyn jınaqty mektep balalar sany tolmaǵandyqtan eki jyl buryn jabylyp qalǵan eken. Aýyldyq okrýgtiń ortalyǵy Jurymnan on segiz shaqyrym qashyqtyqta ornalasqan bul aýyldyń turǵyndary mal ósirýmen aınalysyp, óz nápaqasyn ózderi taýyp otyr. Sońǵy jyldary olardyń kóńilin alańdatyp júrgen basty máseleniń biri kópir bolsa, ony eshkimge mindetsinbeı, óz kúshi, aq adal eńbegimen-aq salyp alǵan kishkentaı aýyl turǵyndarynyń ózara aýyzbirshiligi qandaı iltıpatqa da laıyqty demekpiz.
Aqtóbe oblysy,
Muǵaljar aýdany,
Kóldeneń Temir aýyly
