«Búldirshinder tańǵy asqa otyrǵan kez edi, «gúrs» ete tústi. Ile-shala irgemizdegi áskerı qoıma jaqtan qoıý qara tútin kókke kóterildi. Qatty jarylystan esik-tereze qırap jatty. Jas mamanym qatty shoshyp aıǵaılap jiberdi. Búkil qyzmetkerlerdi jınap, balaqaılardy tez syrtqa shyǵarýdy aıttym. Árbir úıdiń mápelep otyrǵan balapandarynyń amandyǵy meniń moınymda bolǵandyqtan, shuǵyl sheshim qabyldap, esepshi men kúzetshi qyzmetkerlerdiń kóligine 17-20 dan astam búldirshindi otyrǵyzyp jiberdik. Ishke qaıtadan kirip, barlyq bólmelerdi jeke-jeke tekserip shyqtym. Soǵys bolǵandaı, bólmelerdiń bári qırap jatty. Ǵımaratta jan balasy qalmaǵanyna kózim jetkennen keıin ǵana syrtqa shyqtym. Sodan keıin eki-úsh baladan kóterip, eresekterin jetektep, qala syrtyna bet aldyq. Ujym qyzmetshilerine qandaı jaǵdaı bolmasyn búldirshinderdi jandarynan bir eli tastamaýǵa tapsyrdym», deıdi Gaýhar Ýálıhanova.
Keıipkerimizdiń aıtýynsha, apat bolǵan kúni otbasyn, óz balalaryn oılaýǵa shamasy kelmegen.
«Barlyq oıymyz eldiń amanatyn qaladan aman alyp shyǵý boldy. Allanyń qoldaýymen perishtelerdi aman-esen alyp shyqtyq. Shymkenttegi Aqmeshitte, №87 mektepte túngi saǵat 02.00-ge deıin búldirshinderi ata-anasymen qaýyshtyrdyq. Ujym qyzmetkerlerimen birlese otyryp, 113 balaqaıdyń alań kóńil ata-anasyna balapandaryn tabystadyq», deıdi Gaýhar Ýálıhanova.
Aıta keteıik, 24 maýsym kúni Túrkistan oblysy Arys qalasyndaǵy áskerı bólim aýmaǵynda joıqyn jarylys bolǵan edi. Búginde qalany qalpyna keltirý jumystary júrgizilip jatyr.
